देशात प्रथमच मतदानासाठी मोबाईल ॲपचा वापर; बिहार ठरले ई-मतदान घेणारे पहिले राज्य (VIDEO)

पाटणा, बिहार: बिहारमध्ये ६ नगर पंचायती आणि ३६ नगरपालिकांसाठी झालेल्या निवडणुकांमध्ये एक ऐतिहासिक बदल घडला. या निवडणुकांमध्ये प्रथमच नागरिकांनी मोबाईल ॲपच्या माध्यमातून ई-मतदान (E-voting via mobile app) केले. अशा प्रकारे निवडणुकीत मतदानासाठी मोबाईल ॲपचा वापर करणारे बिहार हे देशातील पहिलेच राज्य ठरले आहे.

या निवडणुकीत ६२ टक्क्यांहून अधिक मतदान झाल्याचा प्राथमिक अंदाज आहे. मोबाईलद्वारे ई-मतदान करण्यासाठी ४० हजार नागरिकांनी निवडणूक आयोगाकडे नावनोंदणी केली होती.

ई-मतदानासाठी पुण्यातल्या सीडॅक (C-DAC) संस्थेने, सर्व सुरक्षाव्यवस्था असलेल्या आणि व्हीव्हीपॅट (VVPAT) ची सुविधा असलेल्या दोन मोबाईल ॲपच्या यंत्रणा विकसित केल्या आहेत. या तंत्रज्ञानामुळे मतदानाची प्रक्रिया अधिक सुलभ आणि पारदर्शक होण्यास मदत होईल, अशी अपेक्षा आहे.