मालवणच्या राजकोट किल्ल्यावरील छत्रपती शिवाजी महाराजांचा पुतळा सुरक्षित; पावसामुळे खचलेल्या भरावाची तात्काळ दुरुस्ती सुरू
सिंधुदुर्गनगरी, १६ जून २०२५: सिंधुदुर्ग जिल्ह्यातील मालवण येथील राजकोट किल्ल्यावर नव्याने उभारण्यात आलेल्या छत्रपती शिवाजी महाराजांच्या पुतळ्याची आणि परिसराची सार्वजनिक बांधकाम विभागाचे मुख्य अभियंता शरद राजभोज यांनी आज पाहणी केली. १४ व १५ जून २०२५ रोजी सिंधुदुर्ग जिल्हा व मालवण तालुक्यात झालेल्या मुसळधार पावसामुळे चबुतऱ्याच्या बाजूने भरलेला मातीचा भराव (Backfilling) काही प्रमाणात खचल्याचे दिसून आले. मात्र, छत्रपती शिवाजी महाराजांचा पुतळा आणि चबुतरा पूर्णपणे मजबूत, सुरक्षित आणि सुस्थितीत असून, मुख्य रचनेवर किंवा पुतळ्यावर कोणताही परिणाम झालेला नाही, अशी माहिती मुख्य अभियंता शरद राजभोज यांनी दिली.
नियमित देखभाल आणि सुरक्षा परीक्षण सुरू
मुख्य अभियंता राजभोज यांनी सांगितले की, छत्रपती शिवाजी महाराजांचा पुतळा आणि त्यांच्या भोवतालच्या परिसराची नियमित देखभाल आणि सुरक्षा परीक्षण सार्वजनिक बांधकाम विभागामार्फत नियमानुसार सातत्याने करण्यात येते. पावसामुळे खचलेला भाग तात्काळ दुरुस्त करण्यासाठी आवश्यक उपाययोजना सुरू करण्यात आल्या असून, हे काम अत्यंत तत्परतेने विभाग करत असल्याची माहिती सावंतवाडी सार्वजनिक बांधकाम विभागाने दिली आहे.
पाहणी दौऱ्यात अधिकारी वर्ग उपस्थित
या पाहणी दौऱ्यावेळी अधीक्षक अभियंता मिलिंद कुलकर्णी, उप अभियंता अजित पाटील, मे. राम सुतार आर्ट क्रिएशनचे प्रतिनिधी त्रिविक्रम प्रभुगावकर, स्वातंत्र्य गुणवत्ता सल्लागार सी.एन. कुलकर्णी, कनिष्ठ अभियंता सुरज गिरी, अभियंता श्री. बावणे आदी अधिकारी उपस्थित होते.
- Public Works Department, Rajkot Fort, Malvan, Chhatrapati Shivaji Maharaj Statue, Monsoon Damage, Inspection, Restoration, Sindhudurg District, Infrastructure Safety
- #Malvan #RajkotFort #ShivajiMaharaj #Sindhudurg #PublicWorks #Monsoon #Restoration #MaharashtraNews #HistoricalSite
मालवणच्या राजकोट किल्ल्यावरील छत्रपती शिवाजी महाराजांचा पुतळा सुरक्षित; पावसामुळे खचलेल्या भरावाची तात्काळ दुरुस्ती सुरू
Reviewed by ANN news network
on
६/१६/२०२५ ०४:२३:०० PM
Rating:
Reviewed by ANN news network
on
६/१६/२०२५ ०४:२३:०० PM
Rating:
कोणत्याही टिप्पण्‍या नाहीत: