अण्वस्त्र निर्मिती स्थळांवरील हल्ला; आंतरराष्ट्रीय कायद्यांचे उल्लंघन : इराणची तीव्र प्रतिक्रिया (VIDEO)

 

इराणचे परराष्ट्र मंत्री सय्यद अब्बास अरघची यांचा अमेरिकेला इशारा; 'स्वसंरक्षणार्थ सर्व पर्याय खुले'

तेहरान, २२ जून २०२५: अमेरिकेने इराणमधील फोर्डो, नतान्झ आणि इस्फहान येथील अण्वस्त्र निर्मिती स्थळांवर केलेल्या हल्ल्यानंतर इराणने तीव्र प्रतिक्रिया दिली आहे. अमेरिकेने केलेले हे क्रूर आक्रमण आंतरराष्ट्रीय कायद्यांचे, विशेषतः अण्वस्त्र प्रसारबंदी कराराचे (NPT) उल्लंघन करणारे असल्याचे इराणने म्हटले आहे. अणु सुविधांवरील हल्ल्यांनंतर इराणच्या अणुऊर्जा संघटनेने याबाबत निवेदन जारी केले आहे.

निवेदनात इराणने म्हटले आहे की, हल्ल्यांमुळे किणोत्सर्गाचा (radiological) कोणताही धोका नाही. मात्र, आंतरराष्ट्रीय नियमांचे उल्लंघन करणारी ही कारवाई दुर्दैवाने आंतरराष्ट्रीय अणुऊर्जा संस्थेच्या (IAEA) उदासीनतेमुळे आणि सहभागामुळे झाल्याचा गंभीर आरोप इराणने केला आहे. सुरक्षितता करार आणि एनपीटीनुसार सतत आंतरराष्ट्रीय अणुऊर्जा संस्थेच्या देखरेखीखाली असलेल्या स्थळांवर अमेरिकेने हल्ला केल्याचे इराणने अधोरेखित केले आहे.

परराष्ट्र मंत्र्यांचा अमेरिकेला इशारा: इराणचे परराष्ट्र मंत्री सय्यद अब्बास अरघची यांनी देखील अमेरिकेने केलेल्या हल्ल्यानंतर तीव्र प्रतिक्रिया दिली आहे. संयुक्त राष्ट्र सुरक्षा परिषदेचा स्थायी सदस्य असलेल्या अमेरिकेने इराणच्या शांततापूर्ण अणुप्रकल्पांवर हल्ला करून संयुक्त राष्ट्र सनद, आंतरराष्ट्रीय कायदा आणि एनपीटीचे गंभीर उल्लंघन केल्याचे त्यांनी म्हटले आहे.

आज सकाळी घडलेल्या या घटना अत्यंत भयानक असून त्याचे कायमस्वरूपी परिणाम राहतील, असे अरघची म्हणाले. संयुक्त राष्ट्रांच्या प्रत्येक सदस्याने या अत्यंत धोकादायक, बेकायदेशीर आणि गुन्हेगारी वर्तनाबद्दल सावध असले पाहिजे, असे आवाहन त्यांनी केले. संयुक्त राष्ट्रांची सनद आणि स्वसंरक्षणार्थ कायदेशीर प्रतिसाद देण्याच्या तरतुदींनुसार, इराणने आपले सार्वभौमत्व, हित आणि लोकांचे रक्षण करण्यासाठी सर्व पर्याय राखून ठेवले आहेत, असा स्पष्ट इशारा इराणच्या परराष्ट्र मंत्र्यांनी दिला आहे.

Iran, United States, Nuclear Sites, Attack, International Law, Non-Proliferation Treaty (NPT), Fordow, Natanz, Isfahan, Radiological Threat, IAEA, Iran Atomic Energy Organization, Foreign Minister Sayyed Abbas Araghchi, UN Security Council, UN Charter, Self-defense. 

 #Iran #US #NuclearAttack #InternationalLaw #NPT #MiddleEast #Geopolitics #IranCrisis #IAEA #ForeignPolicy