बेकायदेशीर दस्त नोंदणी, भ्रष्ट कारभाराविरुद्ध 'लोक जनशक्ती पार्टी (रामविलास)'चे 'जवाब दो' आंदोलन (VIDEO)

 

• हवेली क्र. २० च्या सह-दुय्यम निबंधकांवर निलंबनाची मागणी; ढोल वाजवून केला निषेध

पुणे, १८ जून २०२५: सह-दुय्यम निबंधक हवेली क्र. २० मधील बेकायदेशीर दस्त नोंदणी आणि भ्रष्ट कारभाराविरुद्ध लोक जनशक्ती पार्टी (रामविलास) पक्षाने आज सायंकाळी 'जवाब दो' आंदोलन केले. हवेली क्र. २० चे अधिकारी तथा सह-दुय्यम निबंधक पोपटराव भोई यांच्यावर कायदेशीर कारवाई करून त्यांना निलंबित करण्याच्या मागणीसाठी नोंदणी महानिरीक्षक व मुद्रांक नियंत्रक, महाराष्ट्र राज्य शासकीय इमारत (कौन्सिल हॉल समोरील नवीन प्रशासकीय इमारत) यांच्या कार्यालयासमोर ढोल वाजवून हे आंदोलन करण्यात आले.

ग्रामपंचायत परवानग्या असलेल्या इमारतींमधील बेकायदेशीर दस्त नोंदणीचा आरोप

यावेळी बोलताना लोक जनशक्ती पार्टीचे शहर आणि जिल्हाध्यक्ष संजय आल्हाट यांनी गंभीर आरोप केला की, ग्रामपंचायत परवानग्या असलेल्या इमारतींमधील दस्त बेकायदेशीररित्या नोंदवून बिल्डर लॉबीचे भले करण्यात आले आहे. त्यांनी मागणी केली की, या कार्यालयातील दस्तांची निवृत्त न्यायाधीशांची समिती नेमून चौकशी करावी. तसेच, दस्त नोंदणी तपासणी पथकाची देखील खातेनिहाय चौकशी करावी, अधिकारी-कर्मचाऱ्यांच्या मालमत्तेची चौकशी करावी आणि त्यांच्यावर फौजदारी कारवाई करावी. या मागण्या मुख्यमंत्री, उपमुख्यमंत्री, महसूल मंत्री, नोंदणी महानिरीक्षक आणि सह जिल्हा निबंधक यांच्याकडे करण्यात आल्या आहेत.

२०१४ ते २०२४ काळातील दस्त नोंदणीची चौकशीची मागणी

पक्षाने आपल्या निवेदनात म्हटले आहे की, १५ ऑगस्ट २०१४ ते १ ऑक्टोबर २०२४ या काळातील दस्त नोंदणी बेकायदेशीररित्या झाली आहे. यामुळे सामान्य नागरिकांचे नुकसान झाले असून, प्रशासनातील भ्रष्ट कारभार उघड झाला आहे.

असंख्य कार्यकर्त्यांसह पदाधिकारी उपस्थित

या आंदोलनात संजय आल्हाट यांच्यासमवेत के.सी.पवार, कल्पना जावळे, पन्ना शेट्टी कुडेकर, अभिजित पाटील, नारायण भिसे, राहुल उभे, कुसुम दहिरे, योगिता साळवे, रणजीत सोनावळे, बंडू वाघमारे, अक्का साबळे, राम आल्हाट, बाजीराव कुराडे, जयवंत कांबळे, विजय आठवल, प्रवीण बनसोडे, गणेश भोसले आणि मोठ्या संख्येने कार्यकर्ते उपस्थित होते.

---

•  Pune, Lok Janshakti Party (Ram Vilas), Protest, Corruption, Illegal Document Registration, Sub-Registrar Office, Haveli No. 20, Popatrao Bhoi, Sanjay Alhat, Maharashtra Government.
•  #Pune #Protest #Corruption #DocumentRegistration #LokJanshaktiParty #Maharashtra #JawabDoAndolan #IllegalActivities #BuilderLobby.