पालखी मार्गावरील १,४९४ फलकधारकांना पिंपरी चिंचवड महापालिकेच्या नोटीसा

संभाव्य धोका टाळण्यासाठी खबरदारी

पिंपरी, १८ जून २०२५: संत तुकाराम महाराज आणि संत ज्ञानेश्वर महाराज यांच्या पालखी सोहळ्याच्या स्वागतासाठी पिंपरी चिंचवड शहर सज्ज होत असताना, पिंपरी चिंचवड महानगरपालिकेने पालखी मार्गालगत असलेल्या अधिकृत जाहिरात फलकधारकांना या आठवड्यात सुरक्षिततेसंदर्भात नियमांचे काटेकोर पालन करण्याबाबत आवाहन केले आहे. संभाव्य धोका टाळण्यासाठी महापालिकेने शहरातील एकूण १,४९४ अधिकृत जाहिरात फलकधारकांना सूचनापत्रक देखील जारी केले आहे.

पालखी मार्गांची विशेष तपासणी

महापालिकेच्या वतीने देण्यात आलेल्या या सूचना विशेषतः निगडी ते दापोडी, देहू ते आळंदी आणि दिघी ते बोपखेल या पालखी मार्गांवर असलेल्या फलकांसाठी आहेत. मोठ्या प्रमाणावर भाविकांची होणारी गर्दी लक्षात घेता या फलकांची तातडीने तपासणी करून आवश्यक ते बळकटीकरण करण्याच्या सूचना देण्यात आल्या आहेत.

स्ट्रक्चरल ऑडिटची खात्री, तरीही खबरदारी महत्त्वाची

आकाशचिन्ह व परवाना विभागाचे उप आयुक्त राजेश आगळे यांनी सांगितले की, पालखी मार्गावरील सर्व फलकांना वैध परवाने व अद्ययावत संरचनात्मक स्थिरता (structural audit) प्रमाणपत्र देण्यात आली होती. तरीही खबरदारीच्या दृष्टीने प्रत्येक जाहिरात एजन्सीला त्यांच्या फलकांची स्थिती पुन्हा तपासण्याच्या व आवश्यक असल्यास तातडीने सुरक्षा उपाययोजना करण्याच्या सूचना दिल्या गेल्या आहेत. कोणताही अनुचित प्रकार घडल्यास संबंधित एजन्सी जबाबदार असणार आहे, असे त्यांनी स्पष्ट केले.

अधिकृत फलकांची संख्या व तपासणी अहवाल

सुरक्षा तपासणी अहवालानुसार, भक्ती शक्ती चौक ते दापोडी दरम्यानच्या ११ किमी अंतरात ७१ फलकांची तपासणी करण्यात आली आहे. चऱ्होली फाटा ते बोपखेल कॉर्नर या १२ किमी अंतरात ६४ फलक असून, देहू ते आळंदी या १५ किमी अंतरात ८० फलक महापालिका हद्दीत आढळले आहेत. हे सर्व फलक अधिकृत असून, त्यांचा आकार ४० x २० फूट पेक्षा अधिक नाही. तपासणीदरम्यान कोणताही अनधिकृत फलक आढळलेला नाही, मात्र कोणत्याही फलकाच्या सुरक्षेसंदर्भात धोका निर्माण झाल्यास महापालिका तत्काळ कारवाई करणार आहे.

भाविकांच्या सुरक्षेसाठी प्रशासनाचे पाऊल

आयुक्त तथा प्रशासक शेखर सिंह यांनी म्हटले आहे की, "आषाढीवारी पालखी सोहळा हा शहराच्या सांस्कृतिक व आध्यात्मिक परंपरेत भर घालणारा सोहळा आहे. सोहळ्याच्या स्वागतासाठी सज्ज होत असताना लाखो भाविकांच्या सुरक्षेची जबाबदारी ही आपली सामूहिक जबाबदारी आहे. तरी खबरदारी म्हणून सर्व जाहिरात फलकधारकांनी नियमांचे पालन करून पालखी मार्ग सुरक्षित ठेवण्याबाबत सूचना देण्यात आल्या आहेत." पालखी मार्ग सुरक्षित व सुरळीत पार पडावा यासाठी आपत्ती व्यवस्थापन, वाहतूक व स्वच्छता विभागांनाही सज्ज ठेवण्यात आले आहे.

Pimpri Chinchwad, Palkhi Sohala, Sant Tukaram, Sant Dnyaneshwar, PCMC, Hoarding Safety, Monsoon Preparedness, Public Safety, Warkari, Cultural Event, Shekhar Singh.
#PimpriChinchwad #PalkhiSohala #Warkari #SafetyFirst #MonsoonReady #HoardingSafety #PCMC #Maharashtra #CulturalHeritage #PublicSafety.