‘कंफ्लुएन्स’ कथक सादरीकरणाने पुणेकर रसिक मंत्रमुग्ध

पुणे: भारतीय विद्या भवन आणि इन्फोसिस फाउंडेशन यांच्या संयुक्त विद्यमाने आयोजित सांस्कृतिक प्रसार कार्यक्रमांतर्गत, एकल कथक नृत्याचा ‘कंफ्लुएन्स’ हा कार्यक्रम शनिवार, २८ जून २०२५ रोजी पुणे येथे उत्साहात पार पडला. ईश्वरी देशपांडे यांनी आपल्या मोहक आणि आकर्षक सादरीकरणाने प्रेक्षकांना मंत्रमुग्ध केले. हा कार्यक्रम सरदार महादेव बळवंत नातू सभागृह, सेनापती बापट रस्ता येथे सायंकाळी ६ वाजता आयोजित करण्यात आला होता.

नृत्य आणि संगीत यांचा सुरेल संगम

ईश्वरी देशपांडे या ज्येष्ठ नृत्यांगना प्रेरणा देशपांडे यांच्या कन्या आणि शिष्या असून, त्यांच्या नृत्यात गुरुपरंपरेचा दर्जेदार ठसा स्पष्टपणे दिसून आला. नृत्य सादरीकरणाची सुरुवात कृष्ण स्तुतीने झाली. ईशान परांजपे (तबला), यशवंत थिटे (संवादिनी), शुभम खंडाळकर (गायन) आणि कल्याणी गोखले (पढंत) यांनी ईश्वरी देशपांडे यांना साथ दिली. नृत्य आणि संगीत यांच्या सुरेल संगमाने कार्यक्रमाचे 'कंफ्लुएन्स' हे शीर्षक खऱ्या अर्थाने सार्थ ठरले.

२५० व्या कार्यक्रमाचा महत्त्वाचा टप्पा

या कार्यक्रमाला कथक क्षेत्रातील ज्येष्ठ नृत्यांगना डॉ. सुचेता भिडे-चाफेकर, डॉ. सत्यशील देशपांडे यांच्यासह अनेक मान्यवर उपस्थित होते. रसिकांनीही कार्यक्रमास उत्स्फूर्त दाद दिली.

भारतीय विद्या भवन आणि इन्फोसिस फाउंडेशन यांच्या सांस्कृतिक कार्यक्रम मालिकेतील हा २५० वा कार्यक्रम होता. यानिमित्ताने एक महत्त्वाचा टप्पा गाठल्याचे समाधान भारतीय विद्या भवन पुणे केंद्राचे मानद सचिव प्रा. नंदकुमार काकिर्डे यांनी व्यक्त केले. त्यांनी सर्व उपस्थितांचे आणि सहकलाकारांचे मनःपूर्वक आभार मानले. सर्व कलाकारांचा प्रशस्तीपत्र आणि ज्ञानेश्वरीची प्रत देऊन सत्कार करण्यात आला. हा कार्यक्रम सर्व रसिकांसाठी विनामूल्य होता.