मुख्यमंत्री फडणवीस यांची मोठी घोषणा: आळंदी-मोशीतील कत्तलखान्याचे आरक्षण रद्द! स्थानिक नेत्यांच्या भूमिकेवर प्रश्नचिन्ह? (VIDEO)

 

पुणे: पिंपरी-चिंचवड महापालिका सुधारित विकास आराखड्यातील मोशी आणि तीर्थक्षेत्र आळंदी परिसरातील प्रस्तावित कत्तलखान्याचे आरक्षण रद्द करण्यात येणार असल्याची मोठी घोषणा मुख्यमंत्री देवेंद्र फडणवीस यांनी केली आहे. वारकरी, भूमिपुत्र आणि शेतकऱ्यांच्या श्रद्धेशी कोणतीही तडजोड केली जाणार नाही, असे त्यांनी ठामपणे सांगितले.

संतश्रेष्ठ ज्ञानेश्वर महाराज आणि जगद्गुरू संत तुकाराम महाराज यांचा आषाढी वारी पायी पालखी सोहळा पुण्यात दाखल झाला असताना, मुख्यमंत्री फडणवीस यांनी पालखीचे दर्शन घेतले आणि वारकऱ्यांशी संवाद साधला. यावेळी त्यांनी ही महत्त्वपूर्ण घोषणा केली.

दोन दिवसांपूर्वी, पिंपरी-चिंचवडमध्ये विविध विकासकामांच्या भूमिपूजन आणि लोकार्पण कार्यक्रमादरम्यान, मोशी येथील प्रस्तावित कत्तलखाना आरक्षण रद्द करण्याबाबत ग्रामस्थ आणि भूमिपुत्रांनी मुख्यमंत्र्यांना निवेदन दिले होते. या निवेदनांची दखल घेत, मुख्यमंत्र्यांनी तात्काळ हा महत्त्वपूर्ण निर्णय घेतला आहे.

पिंपरी-चिंचवड महापालिकेच्या हद्दीत, आळंदी शहराच्या जवळ कत्तलखान्याचे आरक्षण विकास आराखड्यात टाकल्याने सर्व स्तरांतून तीव्र नाराजी व्यक्त होत होती. श्रीक्षेत्र आळंदीसारख्या पवित्र देवस्थानाच्या परिसरात अशा प्रकारचे आरक्षण असणे हे श्रद्धेच्या विरोधात असल्याचे अनेकांचे मत होते. असे असताना, स्थानिक पातळीवर हे आरक्षण आराखड्यात समाविष्ट होत असताना, येथील दमदार नेते काय करत होते, हा प्रश्न आता उपस्थित होत आहे. मुख्यमंत्री स्वतः पुढाकार घेऊन हा प्रश्न मार्गी लावत असल्याने, स्थानिक नेतृत्वाची भूमिका चर्चेचा विषय बनली आहे.

पुण्यात माध्यमांशी बोलताना देवेंद्र फडणवीस यांनी यावर अधिक स्पष्टीकरण दिले. ते म्हणाले, "विकास आराखड्यामध्ये मोशी-आळंदी येथे कत्तलखाण्याचे आरक्षण दाखवण्यात आले आहे. मात्र, कुठल्याही परिस्थितीत कत्तलखाना होऊ दिला जाणार नाही. त्याबाबतचे आरक्षण वगळण्याचे आदेश मी दिले आहेत. वारकऱ्यांना आणि वारकरी नेत्यांना मी सांगू इच्छितो की, कोणत्याही परिस्थितीत कत्तलखाना होणार नाही."

--------------------------------------------------------------------------------------------------------------------

Pune, Maharashtra, Devendra Fadnavis, Alandi, Moshi, slaughterhouse, cancellation of reservation, Warkari, Ashadhi Wari, development plan, local politics

#Pune #Maharashtra #DevendraFadnavis #Alandi #Moshi #SlaughterhouseCancelled #Warkari #AshadhiWari #DevelopmentPlan #PuneNews #CMO #Politics #MaharashtraPolitics #BreakingNews