पुणे (दि. ७ जून २०२५): आपले शहर स्वच्छ ठेवण्यात पुणे महानगरपालिकेतील सफाई कर्मचारी अत्यंत मोलाचे योगदान देतात. दररोज सकाळपासून रात्रीपर्यंत परिसराच्या स्वच्छतेसाठी ते अथक मेहनत घेतात. मात्र, या सेवेत असताना त्यांना अनेक अडचणींनाही सामोरे जावे लागते. ही परिस्थिती लक्षात घेत कसबा मतदारसंघाचे आमदार हेमंत रासने यांनी विश्रामबाग क्षेत्रीय कार्यालयांतर्गत येणाऱ्या सर्व आरोग्य कोठींना (कचरा संकलन केंद्रे/डेपो) भेट देत सफाई कर्मचाऱ्यांशी संवाद साधला.
आमदार हेमंत रासने यांच्या नेतृत्वाखाली 'स्वच्छ, सुंदर आणि विकसित कसबा' हे अभियान राबवले जात आहे. या अभियानांतर्गत कचऱ्याचे 'क्रॉनिक स्पॉट्स' (सातत्याने कचरा साचणारी ठिकाणे) हटवून त्या ठिकाणी सुशोभीकरण करणे, तीन शिफ्टमध्ये कचरा संकलनासाठी वाहनांची व मनुष्यबळाची वाढ करणे, रस्त्यावरील बेवारस वाहने हटवणे, जनजागृती मोहीम राबवणे आणि गरजेनुसार दंडात्मक कारवाई करणे अशा उपक्रमांची प्रभावी अंमलबजावणी केली जात आहे. या सर्व कामांमध्ये सफाई कर्मचाऱ्यांचा सहभाग अत्यंत महत्त्वाचा असल्याचे रासने यांनी यावेळी स्पष्ट केले.
"स्वच्छता राखण्यासाठी मेहनत घेणाऱ्या सफाई कर्मचाऱ्यांच्या पाठीशी उभे राहणे ही आपली सामूहिक जबाबदारी आहे. साधनांची कमतरता, अपुरे मनुष्यबळ आणि आरोग्यविषयक समस्या यांसारखे प्रश्न सोडवण्यासाठी ठोस उपाययोजना केली जात आहे. नागरिकांचा देखील या अभियानात अधिकाधिक सहभाग वाढवण्यावर भर देण्यात येत आहे," असे रासने यावेळी म्हणाले.
या भेटीवेळी मंडल अध्यक्ष अमित कंक, प्रशांत सुर्वे, माजी नगरसेवक राजेश येनपुरे, गायत्री खडके, मनीषा घाटे, धनंजय जाधव यांच्यासह इतर पदाधिकारी, कार्यकर्ते आणि महापालिकेचे अधिकारी उपस्थित होते.
#Pune #SanitationWorkers #HemantRasane #PMC #Kasba #SwachhBharat #Cleanliness #CommunityHeroes #UrbanHygiene
Reviewed by ANN news network
on
६/०७/२०२५ ०८:३५:०० PM
Rating:
कोणत्याही टिप्पण्‍या नाहीत: