अहमदाबाद विमान दुर्घटनेत ५० वैद्यकीय विद्यार्थ्यांचा मृत्यू; आयएमए एमएसएनकडून मदतीचे आश्वासन

अहमदाबाद/पुणे: बुधवारी (१२ जून) अहमदाबादजवळ झालेल्या बोइंग ७८७ विमान दुर्घटनेत २४९ प्रवाशांचा मृत्यू झाला असून, यात ५० हून अधिक वैद्यकीय विद्यार्थी आणि त्यांचे कुटुंबीय समाविष्ट आहेत. या भीषण दुर्घटनेनंतर 'इंडियन मेडिकल असोसिएशन मेडिकल स्टुडंट्स नेटवर्क' (आयएमए एमएसएन) ने शोकसंवेदना व्यक्त करत पीडित कुटुंबांना सर्वतोपरी मदत करण्याचे आश्वासन दिले आहे.

नवी दिल्लीतील आयएमए हाऊसमधून प्रसिद्ध करण्यात आलेल्या अधिकृत निवेदनात संस्थेने म्हटले आहे की, "ही घटना केवळ गुजरातसाठीच नव्हे, तर संपूर्ण वैद्यकीय समुदाय आणि मानवतेसाठी मोठी शोकांतिका आहे." प्रत्येक गमावलेला जीव आरोग्यसेवा क्षेत्राच्या भविष्यासाठी मोठी हानी असल्याचे त्यांनी नमूद केले.

व्यापक मदत कार्यक्रमाची घोषणा

आयएमए एमएसएनने आपल्या सर्व राज्यस्तरीय युनिट्सना गुजरात, राजस्थान, महाराष्ट्र आणि मध्य प्रदेश या राज्यांमध्ये तत्काळ मदतकार्य सुरू करण्याचे निर्देश दिले आहेत. या मदत कार्यक्रमात मृतांच्या कुटुंबियांना आर्थिक सहाय्य, मानसिक आघाताचा सामना करणाऱ्यांना समुपदेशन, बचाव कार्यातील स्वयंसेवकांना प्रत्यक्ष मदत आणि लॉजिस्टिक समर्थनाचा समावेश आहे.

"आम्ही सर्वजण एक संघ, एक कुटुंब आणि एक समाज म्हणून एकत्र येणे आवश्यक आहे," असे आवाहन संस्थेकडून करण्यात आले आहे. राष्ट्रीय अध्यक्ष डॉ. दिलीप भानुशाली, डॉ. शिव कुमार उत्तर्रे, राष्ट्रीय सरचिटणीस डॉ. सर्बरी दत्ता, आर्थिक सरचिटणीस डॉ. पियुष जैन आणि राष्ट्रीय संयोजक डॉ. सुर्यम सिंग यांनी या निवेदनावर स्वाक्षरी केली आहे.

निवेदनाचा समारोप करताना आयएमए एमएसएनने म्हटले आहे की, "प्रत्येक वैद्यकीय विद्यार्थी आणि प्रभावित कुटुंब, तुम्ही एकटे नाही. भारतातील वैद्यकीय विद्यार्थ्यांचे संपूर्ण नेटवर्क तुमच्यासोबत आहे."