पिंपरी चिंचवड: पिंपरी चिंचवड शहर पोलीस आयुक्तालयाच्या हद्दीत देशी बनावटीच्या पिस्तूलांची विक्री आणि तस्करी करणाऱ्या एका टोळीवर महाराष्ट्र संघटित गुन्हेगारी नियंत्रण अधिनियम (MCOCA) अंतर्गत कठोर कारवाई करण्यात आली आहे. पिंपरी चिंचवड शहर पोलिसांच्या मालमत्ता गुन्हे विरोधी पथकाने तीन सराईत गुन्हेगारांना अटक करून त्यांच्याकडून मोठ्या प्रमाणात अग्निशस्त्रे जप्त केली आहेत.
मिळालेल्या माहितीनुसार, १ जून रोजी पिंपरी चिंचवड पोलिसांच्या मालमत्ता गुन्हे विरोधी पथकातील अंमलदार गणेश सावंत यांना गोपनीय बातमीदाराकडून माहिती मिळाली की, काही सराईत गुन्हेगार बेकायदेशीरपणे पिस्तूल बाळगून आहेत. या माहितीच्या आधारे पथकाने तात्काळ कारवाई करत उमेश चंद्रकांत केदारी (वय २८), मंथन उर्फ गुड्डू अशोक सातारकर (वय २८) आणि विशाल ज्योतिराम खानेकर (वय ३०) या तीन गुन्हेगारांना ताब्यात घेतले.
आरोपींची झडती घेतली असता, त्यांच्या ताब्यातून ५ देशी बनावटीची पिस्तूल, २० जिवंत काडतुसे आणि २ मॅगझीन असा मोठा शस्त्रसाठा जप्त करण्यात आला. जप्त केलेल्या शस्त्रास्त्रांची किंमत ४८,०००/- रुपये इतकी आहे.
सदर आरोपींवर पिंपरी चिंचवड शहर पोलीस आयुक्तालयाच्या हद्दीत दहशत निर्माण करणे आणि देशी पिस्तूलांची तस्करी व विक्री करण्याचा आरोप आहे. या प्रकरणी सुरुवातीला तळेगाव दाभाडे पोलीस स्टेशनमध्ये गुन्हा दाखल करण्यात आला होता. गुन्ह्याच्या तपासात हे आरोपी सराईत आणि संघटित गुन्हेगार असल्याचे निष्पन्न झाले. त्यांच्या संघटित गुन्हेगारीला आळा घालण्यासाठी आणि त्यांच्यावर तात्काळ कारवाई करण्यासाठी, सदर गुन्ह्यामध्ये मोका (MCOCA) कायद्यांतर्गत कलम वाढवण्यात आले आहे.
गुन्ह्याचा पुढील तपास एसीपी विशाल हिरे करत आहेत. पिंपरी चिंचवड शहर पोलिसांनी नागरिकांना आवाहन केले आहे की, कोणीही शहरात बेकायदेशीरपणे पिस्तूल बाळगू नये, त्यांची विक्री करू नये किंवा पिस्तूलांचा वापर करून दहशत निर्माण करू नये. पोलिसांनी स्पष्ट केले आहे की, यापुढे जो कोणी असे अवैध शस्त्र बाळगेल किंवा त्यांची तस्करी करेल, त्यांच्यावर मोका कायद्यांतर्गत कठोर कारवाई केली जाईल.
Pimpri Chinchwad, Firearms Arrest, MCOCA, Illegal Weapons, Organized Crime, Police Action.
#PimpriChinchwad #FirearmsArrest #MCOCA #IllegalWeapons #PuneCrime #PoliceAction
Reviewed by ANN news network
on
६/२६/२०२५ ०९:२२:०० PM
Rating:
कोणत्याही टिप्पण्या नाहीत: