खेड : खेड तालुक्यात सुरू असलेल्या 'छत्रपती शिवाजी महाराज महाराजस्व अभियानांतर्गत' गुरुवारी, १२ जून रोजी तळे येथील सामाजिक कार्यकर्ते श्रीकांत शिर्के यांच्या अंगणात 'महाराजस्व समाधान शिबिरा'चे आयोजन करण्यात आले. ग्रामीण भागातील जनतेला विविध दाखले मिळवण्यासाठी तालुक्याच्या मुख्यालयात ये-जा करण्याचा वेळ व आर्थिक भुर्दंड वाचवण्यासाठी हे शिबिर अत्यंत उपयुक्त ठरले.
२१ महसुली गावातील जनतेला लाभ; तहसीलदार सोनावणे यांची पाहणी
तळे मंडळ अंतर्गत येणाऱ्या तळे, सुकीवली, दहीवली, मांडवे जैतापूर, देवघर, कुडोशी, कर्टेल, चिंचवाडी, मोहाने, ऐनवली आदी २१ महसुली गावातील जनतेसाठी या शिबिराचे आयोजन करण्यात आले होते. या शिबिरात सुमारे १०० पेक्षा जास्त ग्रामस्थांनी लाभ घेतला. यावेळी २५ उत्पन्न प्रमाणपत्रे, ८ जातीचे दाखले, १३ इतर दाखले, ११ वारस फेरफार, तर ९५ सातबारा व खाते उतारे वितरित करण्यात आले. तसेच, 'ॲग्रीस्टॅक' अंतर्गत ३ शेतकऱ्यांची नोंदणी करण्यात आली. तहसीलदार सुधीर सोनावणे यांनी शिबिराला भेट देऊन कामकाजाची पाहणी केली आणि उपस्थित शेतकऱ्यांना मार्गदर्शन केले.
शिबिरासाठी प्रशासकीय यंत्रणा आणि सामाजिक कार्यकर्त्यांचे सहकार्य
या शिबिराला यशस्वी करण्यासाठी खेडचे प्रांत शिवाजी जगताप, तहसिलदार सुधीर सोनावणे यांच्या मार्गदर्शनाखाली मंडळ अधिकारी अर्चना लाकडे, सुकीवली व तळेचे ग्राम महसूल अधिकारी रोहन पाटेकर, मांडवेचे शेखर खोपकर, देवघरचे योगेश आपटे, दहीवलीचे राजेश चव्हाण, कोतवाल सुनील पवार, मनस्वी जाधव, सुदेश घाग, उमेश मोरे तसेच सर्व पोलीस पाटील व कृषी सहाय्यक आदींनी विशेष मेहनत घेतली.
इंटरनेट समस्येवर श्रीकांत शिर्के यांच्याकडून तात्पुरता उपाय
तळे मंडळात इंटरनेटच्या गतीची अडचण लक्षात घेऊन, सामाजिक कार्यकर्ते श्रीकांत शिर्के यांनी त्यांच्याकडे असलेले वैयक्तिक वापराचे वायफाय कनेक्टिव्हिटी या कार्यक्रमाला उपलब्ध करून दिले. यामुळे शिबिरातील कामकाजाला गती मिळाली. यासाठी तळेच्या मंडळ अधिकारी अर्चना लाकडे यांनी महसूल विभागाच्या वतीने त्यांचे आभार मानले.
------------------------------------------------------------------------------------------------------------------------
- Government Camp, Public Services, Revenue Department, Khed Taluka, Tale, Certificates, Rural Development, Community Initiative, Maharashtra
- #Khed #Tale #MaharajyashvaAbhiyan #PublicServices #RuralDevelopment #GovernmentInitiative #PuneDistrict #MaharashtraNews #CitizenFacilitation
Reviewed by ANN news network
on
६/१६/२०२५ ०४:०८:०० PM
Rating:
कोणत्याही टिप्पण्या नाहीत: