उरण, दि. २६ जून २०२५: नवी मुंबईत येऊ घातलेल्या आंतरराष्ट्रीय विमानतळाला लोकनेते दि. बा. पाटील यांचे नाव देण्याबाबत केंद्र सरकारने उद्घाटनापूर्वी अधिसूचना काढण्याच्या मागणीसाठी कामगार नेते आणि जेएनपीटीचे माजी विश्वस्त कॉम्रेड भूषण पाटील यांनी २४ जून २०२५ रोजी जासई येथील हुतात्मा स्मारकाजवळ सुरू केलेले आमरण उपोषण स्थगित केले आहे. माजी खासदार लोकनेते रामशेठ ठाकूर यांच्या हस्ते सरबत घेऊन त्यांनी उपोषणाची सांगता केली.
स्मृतिदिनी उपोषणाला सुरुवात
प्रकल्पग्रस्तांचे झुंजार लोकनेते दि. बा. पाटील यांचा १२ वा स्मृतिदिन मंगळवारी होता. याच दिवशी कॉम्रेड भूषण पाटील यांनी उपोषणाला सुरुवात केली होती. उपोषणाच्या ठिकाणी दुपारच्या दरम्यान जाहीर श्रद्धांजली सभेचे आयोजन करण्यात आले होते.
या सभेला विमानतळ नामकरण समितीचे अध्यक्ष दशरथदादा पाटील, उपाध्यक्ष माजी खासदार लोकनेते रामशेठ ठाकूर, ज्येष्ठ नेते जे. एम. म्हात्रे, वाय. टी. देशमुख, दि. बा. पाटील यांचे सुपुत्र अतुल पाटील, दीपक म्हात्रे, जे. डी. तांडेल, कामगार नेते सुरेश पाटील, जितेंद्र म्हात्रे, सीमा घरत, नंदराज मुंगाजी, सुधाकर पाटील, नीलेश पाटील यांच्यासह अनेक मान्यवर उपस्थित होते.
नामकरणाबाबतचा विश्वास
यावेळी दि. बा. पाटील यांचे सुपुत्र अतुल पाटील यांनी नामकरणाबाबतची सद्यस्थिती स्पष्ट केली आणि विमानतळाच्या उद्घाटनाच्या दिवशीच नामकरण होईल, असा विश्वास व्यक्त केला. नामकरण समितीचे अध्यक्ष दशरथदादा पाटील आणि माजी खासदार लोकनेते रामशेठ ठाकूर यांनीही अतुल पाटील यांच्या भूमिकेला दुजोरा दिला.
उपस्थित सर्व मान्यवरांनी केलेल्या विनंतीनुसार, कॉम्रेड भूषण पाटील यांनी आपलं उपोषण स्थगित करण्याचा निर्णय घेतला. दि. बा. पाटील यांच्या नावाने विमानतळाचे नामकरण लवकरच होईल, अशी आशा व्यक्त करण्यात येत आहे.
Navi Mumbai International Airport (NMIA), Di Ba Patil, Naming Controversy, Bhushan Patil, Hunger Strike, Project Affected Persons (PAP), Political Leaders, Ramseth Thakur, Memorial, Announcement
#NaviMumbaiAirport #DiBaPatil #AirportNaming #BhushanPatil #HungerStrike #PAPRights #MaharashtraPolitics #NMIA #Loknete
Reviewed by ANN news network
on
६/२७/२०२५ ०३:३३:०० PM
Rating:
कोणत्याही टिप्पण्‍या नाहीत: