भाजप आमदार अमित गोरखे यांची महाराष्ट्र विधानपरिषदेच्या 'तालिका सभापती'पदी निवड (VIDEO)

पुणे: पावसाळी अधिवेशन २०२५ च्या पार्श्वभूमीवर एक महत्त्वाचा निर्णय घेण्यात आला आहे. भाजपचे अभ्यासू आणि नव-चर्चित तरुण आमदार अमित गोरखे यांची महाराष्ट्र विधानपरिषदेच्या तालिका सभापतीपदी निवड करण्यात आली आहे. या नियुक्तीची अधिकृत घोषणा विधानपरिषद सभापती राम शिंदे यांनी सभागृहात केली.

अमित गोरखे यांची प्रतिक्रिया

या निवडीवर प्रतिक्रिया देताना आमदार अमित गोरखे म्हणाले: "मा. सभापती राम शिंदे यांनी माझ्यावर दाखवलेला विश्वास माझ्यासाठी अत्यंत सन्मानाची आणि जबाबदारीची बाब आहे. तालिका सभापतीपद ही केवळ एक पद नाही, तर विधानपरिषदेच्या कार्यवाहीतील शिस्त, प्रक्रियात्मक पारदर्शकता आणि संयमाचे प्रतिनिधित्व करणारी भूमिका आहे. या पदाचा योग्य मान राखण्यासाठी आणि सभागृहाच्या कार्यक्षमतेला चालना देण्यासाठी मी पूर्ण प्रामाणिकपणे योगदान देईन."

गोरखे पुढे म्हणाले, "नवनिर्वाचित आमदार म्हणून सभागृहात माझे पदार्पण होत असतानाच मला हे पद मिळणे, हा माझ्यासाठी मोठा सन्मान आहे. आपण माझ्यावर जो विश्वास दाखवला आहे, तो माझ्यासाठी अनमोल आहे. मी सभागृहातील सर्व सदस्यांचे मनःपूर्वक आभार मानतो, ज्यांनी या निवडीला सहमती दर्शवली."

त्यांनी महाराष्ट्राचे लोकप्रिय मुख्यमंत्री देवेंद्र फडणवीस यांचेही विशेष आभार मानले. "त्यांच्या मार्गदर्शनामुळे आणि आशीर्वादामुळेच मी आज या जबाबदारीच्या ठिकाणी उभा आहे. आपण दाखवलेला विश्वास मी नक्कीच सार्थ ठरवीन," असे गोरखे यांनी नमूद केले.

युवा नेतृत्वाला बळ

आमदार अमित गोरखे यांना त्यांची ठाम वक्तृत्वशैली, मुद्देसूद अभ्यास आणि जनतेशी असलेली थेट नाळ यासाठी ओळखले जाते. या नियुक्तीमुळे विधानपरिषदेत भाजपच्या युवा नेतृत्वाला बळ मिळाले असून, सभागृहात नवा ऊर्जा प्रवाह निर्माण होईल, असा विश्वास अनेक मान्यवरांनी व्यक्त केला आहे.