बनावट ॲडमिशन रॅकेटचा पर्दाफाश: थायलंडला पळून जाण्याच्या तयारीत असलेल्या आरोपीला कोलकत्ता विमानतळावर अटक

 

पुणे, दि. 4 जून: पुण्यातील प्रतिष्ठित सिम्बायोसिस संस्थेमध्ये ॲडमिशन मिळवून देण्याच्या नावाखाली विद्यार्थ्यांची लाखो रुपयांची फसवणूक करणाऱ्या टोळीतील एका सराईत गुन्हेगाराला गुन्हे शाखेच्या अंमली पदार्थ विरोधी पथक-१ ने कोलकत्ता विमानतळावरून अटक केली आहे. कुमार कुणाल बिरेंद्रकुमार विद्यार्थी (वय ३०, मूळ रा. बिहार) असे अटक करण्यात आलेल्या आरोपीचे नाव आहे. तो त्याच्या पत्नीसह थायलंडला पळून जाण्याच्या तयारीत असताना पोलिसांनी ही कारवाई केली.

काय आहे प्रकरण?

सिम्बायोसिस संस्थेचा लोगो आणि इमारतीचा फोटो वापरून बनावट वेबपेज तयार करण्यात आले होते. या वेबपेजवरून आरोपी दिव्या, आकाश यादव आणि कुणाल कुमार हे परराज्यातील इसम सिम्बायोसिस संस्थेत ॲडमिशन मिळवून देण्याबाबत खोट्या जाहिराती देत होते. विद्यार्थ्यांना ॲडमिशनचे आमिष दाखवून त्यांच्याकडून कॉलेज फी व्यतिरिक्त लाखो रुपयांची मागणी करून त्यांची फसवणूक करण्याचा प्रयत्न हे आरोपी करत होते. याप्रकरणी २ एप्रिल २०२५ रोजी डेक्कन पोलीस स्टेशनमध्ये गुन्हा नोंदविण्यात आला होता. गुन्हा दाखल झाल्यापासून तिन्ही आरोपी फरार होते.

पोलिसांचा तपास आणि आरोपीची पार्श्वभूमी

अंमली पदार्थ विरोधी पथकाच्या अधिकाऱ्यांनी दोन ते तीन वेळा दिल्ली आणि हरियाणा राज्यात जाऊन आरोपींचा शोध घेतला, परंतु ते पोलिसांना गुंगारा देऊन पळून जाण्यात यशस्वी होत होते. तपास अधिकाऱ्यांनी आरोपींविरुद्ध लुकआऊट नोटीस जारी करून त्यांचा महाराष्ट्र, दिल्ली आणि हरियाणात कसोशीने शोध सुरू ठेवला होता. अटक करण्यात आलेला आरोपी कुमार कुणाल बिरेंद्रकुमार विद्यार्थी याचा पूर्वेतिहास तपासला असता, त्याच्याविरुद्ध २०२१ मध्ये सायबर पोलीस स्टेशन, पुणे शहर येथे फसवणुकीचा गुन्हा (गु.र.नं ४६/२०२१, भा.दं.वि. कलम ४१९, ४२०, १२० ब, २०१, ३४ सह आय. टी. ॲक्ट कलम ४३(अ)(फ)(जी)(आय), ६६(सी), ६६(डी)) दाखल असल्याचे निष्पन्न झाले. त्याने सत्र न्यायालयात अटकपूर्व जामिनासाठी केलेला अर्जही फेटाळण्यात आला होता आणि तो या गुन्ह्यातही फरार होता.

अटक आणि पुढील कारवाई

आरोपी कुमार कुणाल हा सराईत गुन्हेगार असल्याने पुणे, मुंबई आणि दिल्ली येथे त्याचा शोध घेण्यासाठी पोलिसांची पथके तयार करण्यात आली होती. दरम्यान, ३१ मे २०२५ रोजी आरोपी कुणाल कुमार हा पत्नीसह थायलंडला जाण्यासाठी कोलकत्ता विमानतळावर येणार असल्याची खात्रीशीर माहिती गुन्हे शाखेला मिळाली. त्यानुसार, गुन्हे शाखेचे एक पथक तातडीने कोलकत्ता येथे रवाना झाले आणि त्यांनी विमानतळावर सापळा रचून कुमार कुणाल बिरेंद्रकुमार विद्यार्थी याला ताब्यात घेतले. त्याला अटक करून न्यायालयात हजर केले असता, न्यायालयाने त्याला ५ जून २०२५ पर्यंत पोलीस कोठडी सुनावली आहे. या गुन्ह्याचा अधिक तपास पोलीस निरीक्षक उल्हास कदम हे करत आहेत.

कारवाई करणारी टीम

ही कारवाई अपर आयुक्त (गुन्हे) पंकज देशमुख,  उप आयुक्त (गुन्हे) निखील पिंगळे, सहायक आयुक्त (गुन्हे-१) गणेश इंगळे यांच्या मार्गदर्शनाखाली अंमली पदार्थ विरोधी पथक-१ चे वरिष्ठ निरीक्षक उल्हास कदम, सहायक निरीक्षक अनिकेत पोटे, अंमलदार प्रवीण उत्तेकर, दत्ताराम जाधव, संदिप शिर्के, विशाल दळवी, मारुती पारधी, संदेश काकडे यांच्या पथकाने केली आहे.

------------------------------------------------------------------------------------------------------------

 #PuneCrime #AdmissionScam #FraudAlert #PunePolice #Symbiosis #Arrested #CrimeNews #KolkataAirport #AntiNarcoticsCell