पुणे बालपुस्तक जत्रेचे मॉडेल राज्यभर नेणार; शिक्षणमंत्र्यांची घोषणा

 

पहिल्याच बालपुस्तक जत्रेला २५ हजारांहून अधिक मुलांचा उदंड प्रतिसाद

पुणे: "सध्याच्या मोबाइल आणि एआयच्या काळात मुलांना पुस्तकांकडे आणि वाचनाकडे वळवणे अत्यंत महत्त्वाचे आहे. पुणे बालपुस्तक जत्रेचा यशस्वी प्रयोग आता केवळ पुण्यापुरता मर्यादित न राहता राज्यभर विभाग, जिल्हा आणि तालुका पातळीवर नेण्यासाठी शिक्षण विभाग लवकरच पुढाकार घेईल," अशी महत्त्वपूर्ण घोषणा शालेय शिक्षणमंत्री दादाजी भुसे यांनी आज केली.

राष्ट्रीय पुस्तक न्यास, पुणे पुस्तक महोत्सव, पुणे महानगरपालिका आणि संवाद पुणे यांच्या संयुक्त विद्यमाने गणेश कला क्रीडा मंच येथे आयोजित पुणे बालपुस्तक जत्रा कार्यक्रमात ते बोलत होते. याप्रसंगी राष्ट्रीय पुस्तक न्यासचे विश्वस्त आणि पुणे पुस्तक महोत्सवाचे मुख्य संयोजक राजेश पांडे, बालभारतीचे संचालक कृष्णकुमार पाटील, किशोर मासिकाचे संपादक किरण केंद्रे, सावित्रीबाई फुले पुणे विद्यापीठाच्या व्यवस्थापन परिषदेचे सदस्य सागर वैद्य, प्रसेनजित फडणवीस आणि संवाद पुणेचे सुनील महाजन आदी मान्यवर उपस्थित होते. याच कार्यक्रमात शिक्षणमंत्री भुसे यांच्या हस्ते किशोर मासिकाच्या अंकासोबतच साने गुरुजींच्या 'श्यामची आई' आणि इतर पुस्तकांचे इंग्रजी अनुवादित आवृत्तीचे प्रकाशन करण्यात आले.

यावेळी बोलताना दादाजी भुसे म्हणाले, "पुणे बालपुस्तक जत्रा हा एक नाविन्यपूर्ण प्रयोग आहे आणि यातून कार्यकर्त्यांनाही शिकायला मिळत आहे. हे मॉडेल आता राज्य आणि जिल्हा स्तरावर नेण्यासाठी शिक्षण विभाग निश्चित प्रयत्न करेल. यासाठी संयुक्तपणे राज्यभर आयोजन केले जाईल. शिक्षण विभाग राज्यातील पहिली ते बारावीच्या विद्यार्थ्यांसाठी गुणवत्तापूर्ण आणि आनंददायी शिक्षणासाठी कटिबद्ध आहे." त्यांनी गरीब विद्यार्थ्यांना दर्जेदार शिक्षण देण्याच्या सरकारच्या प्रयत्नांवरही प्रकाश टाकला.

भुसे यांनी केंद्रीय शिक्षणमंत्री धर्मेंद्र प्रधान यांच्याकडे केलेल्या मागण्यांची माहिती दिली. छत्रपती शिवाजी महाराजांचा इतिहास देशपातळीवर शिकवण्याची मागणी त्यांनी त्वरित मान्य केली असून अंमलबजावणीचे निर्देश दिले आहेत. तसेच, अभिजात दर्जा मिळालेली मराठी भाषा इतर माध्यमांच्या शाळांमध्ये सक्तीची करण्याची मागणीही मान्य करण्यात आली असून, सीबीएसईने महाराष्ट्रात मराठी शिकवण्याचे निर्देश दिले आहेत. आगामी काळात शिक्षण क्षेत्रात सकारात्मक बदल दिसतील, असा विश्वास त्यांनी व्यक्त केला.

पुणे बालपुस्तक जत्रेला पहिल्या तीन दिवसांत २५ हजारांहून अधिक मुलांनी भेट दिली, अशी माहिती राजेश पांडे यांनी दिली. ते म्हणाले, "खेळ, पुस्तके आणि खाऊ एकाच ठिकाणी उपलब्ध झाल्याने या जत्रेला मुलांचा आणि पुणेकरांचा उदंड प्रतिसाद मिळाला आहे. ही जत्रा मुलांच्या भावविश्वाला निश्चितपणे आकार देईल."

-----------------------------------------------------------------------------------------------

#Pune #BalPustakJatra #ChildrensBooks #EducationMinister #DadajiBhuse #BookFair #ReadingHabit #MaharashtraEducation #KidsEvent #LiteratureForChildren