टाटा मोटर्स आणि लाईटहाऊस उपक्रमातून २४ युवकांना रोजगार संधी

पिंपरी: टाटा मोटर्स आणि लाईटहाऊस कम्युनिटीज फाउंडेशन यांच्या संयुक्त उपक्रमामुळे २४ युवकांना नामांकित कंपनीत रोजगाराची संधी मिळाली आहे. या उपक्रमांतर्गत निवड झालेल्या युवकांना तीन वर्षांचे व्यावसायिक प्रशिक्षण, मानधन आणि इतर सुविधा मिळणार आहेत.

टाटा मोटर्स आणि लाईटहाऊस कम्युनिटीज फाउंडेशन यांनी पिंपरी येथील लाईटहाऊस केंद्रात विशेष नोकरी मेळाव्याचे आयोजन केले होते. या मेळाव्यात आयटीआय उत्तीर्ण किंवा १२ वी पास असलेल्या युवक-युवतींसाठी संधी उपलब्ध होती. मेळाव्यात ८० हून अधिक युवक-युवतींनी सहभाग घेतला, त्यापैकी ४२ जणांची प्राथमिक निवड झाली.

प्राथमिक निवड झालेल्या उमेदवारांनी लाईटहाऊसचा फाउंडेशन कोर्स पूर्ण केला. त्यानंतर टाटा मोटर्सच्या मनुष्यबळ विभागाने अंतिम मुलाखती घेतल्या, ज्यात २४ उमेदवारांची निवड झाली. निवड झालेले सर्व उमेदवार वैद्यकीय तपासणीनंतर टाटा मोटर्समध्ये रुजू झाले आहेत.

या उमेदवारांना नेटूर टेक्निकल ट्रेनिंग फाउंडेशन (एनटीटीएफ) च्या माध्यमातून तीन वर्षांचे मॅन्युफॅक्चरिंग डिप्लोमा प्रशिक्षण, दरमहा १६ हजार रुपयांपर्यंत मानधन आणि कॅन्टीन व वाहतूक सुविधा मिळणार आहेत.

हा उपक्रम ‘कौशल्यम – लाईटहाऊस प्रकल्पा’ अंतर्गत आयोजित करण्यात आला होता. पिंपरी चिंचवड महानगरपालिका आणि लाईटहाऊस कम्युनिटीज फाउंडेशन यांनी १८ ते ३५ वयोगटातील आर्थिकदृष्ट्या दुर्बळ आणि सुशिक्षित बेरोजगार युवक-युवतींसाठी कौशल्य प्रशिक्षण व रोजगार निर्मितीवर लक्ष केंद्रित केले आहे. या उपक्रमामुळे अनेक युवकांना रोजगार मिळाला आहे, जे त्यांच्या उज्ज्वल भविष्यासाठी महत्त्वाचे पाऊल आहे.