रत्नागिरीत कर्करोग निदानासाठी अत्याधुनिक व्हॅन; तपासणी मोहिमेचा पालकमंत्र्यांच्या हस्ते शुभारंभ

 

रत्नागिरी, दि. २४ : रत्नागिरी जिल्ह्यासाठी एक महत्त्वपूर्ण आरोग्य उपक्रम सुरू झाला आहे. शासकीय वैद्यकीय महाविद्यालय परिसरात आज एका अत्याधुनिक कर्करोग निदान व्हॅनचे (फिरते रुग्णालय) लोकार्पण राज्याचे पालकमंत्री डॉ. उदय सामंत यांच्या हस्ते झाले. याप्रसंगी त्यांनी कर्करोग तपासणी मोहिमेचा शुभारंभही केला.

या कार्यक्रमाला शासकीय वैद्यकीय महाविद्यालयाचे अधिष्ठाता डॉ. जयप्रकाश रामानंद, जिल्हा शल्य चिकित्सक डॉ. भास्कर जगताप, जिल्हा आरोग्य अधिकारी डॉ. अनिरुद्ध आठल्ये, प्रांताधिकारी जीवन देसाई, तसेच राहुल पंडित, बंड्या साळवी, बिपीन बंदरकर यांसारखे मान्यवर उपस्थित होते.

पालकमंत्री डॉ. सामंत यांनी यावेळी कर्करोग निदान व्हॅनची बारकाईने पाहणी केली. जिल्हा शल्य चिकित्सक डॉ. जगताप यांनी या व्हॅनमध्ये उपलब्ध असलेल्या सुविधांविषयी पालकमंत्र्यांना सविस्तर माहिती दिली.

या विशेष मोहिमेअंतर्गत मे आणि जून महिन्यादरम्यान जिल्ह्यातील प्रत्येक तालुक्यात ही व्हॅन गावोगावी भेट देणार आहे. या फिरत्या रुग्णालयात नागरिकांची मुख, स्तन आणि गर्भाशय मुख कर्करोगासाठी तपासणी केली जाईल. या उपक्रमाचा मुख्य उद्देश ग्रामीण आणि दुर्गम भागातील लोकांपर्यंत अत्यावश्यक तपासणी सेवा पोहोचवणे हा आहे. यामुळे कर्करोगाचे वेळेवर निदान होण्यास मदत होईल आणि संभाव्यतः अनेक लोकांचे प्राण वाचवता येतील. ही व्हॅन सामान्य कर्करोगांच्या तपासणीसाठी आवश्यक उपकरणांनी सुसज्ज आहे. सुरुवातीच्या टप्प्यात डिजिटल मशीनद्वारे स्तनाच्या तपासण्या आणि कॉल्पोस्कोपच्या साहाय्याने गर्भाशयाच्या मुखाच्या तपासण्यांवर विशेष लक्ष केंद्रित केले जाणार आहे.

आरोग्य विभागाने जिल्ह्यातील नागरिकांना या मोफत संधीचा लाभ घेण्याचे आवाहन केले आहे. मुख, स्तन आणि गर्भाशय मुख कर्करोगाची तपासणी करून घ्यावी, जेणेकरून भविष्यातील आरोग्य धोके टाळता येतील.

शासकीय वैद्यकीय महाविद्यालय व जिल्हा सामान्य रुग्णालयाचा आढावा:

या कार्यक्रमाव्यतिरिक्त, पालकमंत्री उदय सामंत यांनी शासकीय वैद्यकीय महाविद्यालयात शासकीय वैद्यकीय महाविद्यालय आणि जिल्हा सामान्य रुग्णालयातील कामकाजाचा आढावा घेतला. या बैठकीत वैद्यकीय महाविद्यालयाचे अधिष्ठाता डॉ. जयप्रकाश रामानंद, जिल्हा शल्य चिकित्सक डॉ. भास्कर जगताप, जिल्हा आरोग्य अधिकारी डॉ. अनिरुद्ध आठल्ये, प्रांताधिकारी जीवन देसाई, तहसीलदार राजाराम म्हात्रे, कार्यकारी अभियंता अमोल ओटवणेकर यांच्यासह संबंधित विभागांचे अधिकारी उपस्थित होते.

• -----------------------------------------------------------------------------------------
• #Ratnagiri #CancerDetection #MobileHealthcare #UdaySamant #HealthForAll #CancerScreening #RuralHealthInitiative #MaharashtraHealth