उत्तमनगरमध्ये पाणीपुरी न दिल्याने विक्रेत्याला बेदम मारहाण; दोघे अटकेत

 

पुणे: रॉयल पाणीपुरी सेंटरजवळ  हाणामारी, तरुणाला दगड मारून जखमी केले

पुणे: उत्तमनगर पोलीस स्टेशनच्या हद्दीतील रॉयल पाणीपुरी सेंटरजवळ केवळ पाणीपुरी न दिल्याच्या कारणावरून झालेल्या भांडणात एका पाणीपुरी विक्रेत्याला मारहाण करण्यात आली. या प्रकरणी उत्तमनगर पोलिसांनी दोन आरोपींना अटक केली आहे. त्यांच्याविरुद्ध गुन्हा दाखल करण्यात आला आहे.

पोलीस उपनिरीक्षक मुकेश कुरेवाड यांनी दिलेल्या माहितीनुसार, ही घटना २२ मे २०२५ रोजी रात्री १० वाजता हॉटेल जयमल्हार समोर, अहिरे गेट, उत्तमनगर येथे घडली. उत्तमनगर येथे राहणारा २५ वर्षीय पाणीपुरी विक्रेता नेहमीप्रमाणे आपला व्यवसाय करत होता. त्यावेळी करणसिंह सुरेंदरसिंह गचंड (वय २०, रा. आरतीनिवास उत्तमनगर) आणि दर्शन सुरेश पवार (वय २०, रा. मोरे हाइट्स भिकोबा नगर चाळ उत्तमनगर) या दोघांनी त्याच्याकडे पाणीपुरी मागितली.

विक्रेत्याने काही कारणास्तव पाणीपुरी देण्यास नकार दिल्याने आरोपींना राग आला. त्यांनी विक्रेत्याला शिवीगाळ करण्यास सुरुवात केली आणि त्यानंतर त्याला हात व लाथांनी मारहाण केली. इतकेच नव्हे, तर आरोपींनी विक्रेत्याच्या डोक्यात दगड मारून त्याला गंभीर जखमी केले. घटनेची माहिती मिळताच उत्तमनगर पोलिसांनी तातडीने घटनास्थळी धाव घेऊन दोन्ही आरोपींना अटक केली. पुढील तपास पोलीस उपनिरीक्षक मुकेश कुरेवाड करत आहेत.

------------------------------------------------------------------------------------------

#Pune #Assault #StreetFight #UttamnagarPolice #Arrested #CrimeNews #PuneCrime #PaniPuri #MaharashtraPolice #PettyQuarrel