अजित गव्हाणे यांच्या प्रचार मोहिमेत दिग्गजांचा सहभाग

भोसरी मतदारसंघात महाविकास आघाडीच्या प्रचाराला वेग

भोसरी (प्रतिनिधी): भोसरी विधानसभा मतदारसंघातील इंद्रायणीनगर आणि बालाजीनगर परिसरातून महाविकास आघाडीचे उमेदवार अजित गव्हाणे यांना मोठी आघाडी मिळवून देण्याची जबाबदारी स्वीकारत माजी नगरसेवक आणि ज्येष्ठ पदाधिकारी गुरुवारी प्रचार मोहिमेत सक्रिय झाले.

स्थायी समितीच्या माजी अध्यक्षा सीमा सावळे, माजी नगरसेवक संजय वाबळे, रवी लांडगे, सारिका लांडगे, विक्रांत लांडे यांच्यासह अनेक दिग्गज नेते प्रचार फेरीत सहभागी झाले. बुधवारी शरद पवार यांच्या सभेनंतर वातावरणात झालेला बदल प्रचार दौऱ्यातील गर्दीतून प्रकर्षाने जाणवला.

गव्हाणे यांनी बालाजीनगर येथील गणपती, दुर्गा माता, हनुमान आणि दत्त मंदिरात दर्शन घेतले. समता मंडळ, साम्राज्य प्रतिष्ठान, वीर हनुमान, उत्कृष्ट मंडळासह विविध सामाजिक संघटनांनी त्यांचे स्वागत केले. मंडळांच्या पदाधिकाऱ्यांनी गव्हाणे यांना असलेल्या पाठिंब्याची ग्वाही दिली.

"इंद्रायणीनगर आणि बालाजीनगर परिसरातील शांतता आणि सलोखा महत्त्वाचा असून, या भागात सुनियोजित व्यवस्थापन आणि शांतता प्रस्थापित करण्यासाठी विशेष प्रयत्न केले जातील," असे गव्हाणे यांनी यावेळी सांगितले.