वाल्हेकरवाडी, बिजलीनगरात जगतापांच्या प्रचाराला जनसागर

 

 बैलगाडीतून शंकर जगतापांचा भव्य प्रचार दौरा

चिंचवड (प्रतिनिधी): महायुतीचे अधिकृत उमेदवार शंकर जगताप यांच्या प्रचारार्थ वाल्हेकरवाडी, प्रेमलोक पार्क आणि बिजलीनगर परिसरात मंगळवारी भव्य दौरा काढण्यात आला. बैलगाडीतून निघालेल्या या प्रचार फेरीला नागरिकांचा उत्स्फूर्त प्रतिसाद मिळाला.

प्रेमलोक पार्क येथून सुरू झालेल्या दौऱ्यात फटाक्यांची आतिषबाजी आणि ढोल-ताशांच्या गजरात जगताप यांचे जागोजागी स्वागत करण्यात आले. नागरिकांनी त्यांच्यावर पुष्पवर्षाव केला.

इंदिरानगर, दळवीनगर, रघुमाउली गार्डन, सुखनगरी सोसायटी, बिजलीनगर, ओम कॉलनी, विवेक वसाहत मार्गे वाल्हेकरवाडी पर्यंत फिरताना जगताप यांनी मतदारांशी संवाद साधला आणि कमळ चिन्हावर मतदान करण्याचे आवाहन केले.

"चिंचवड आणि वाल्हेकरवाडी भागात विकासकामांना चांगला वाव असून, राज्य शासन व महापालिकेच्या माध्यमातून नवीन प्रकल्प आणि योजना राबवून मतदारसंघ स्मार्ट करण्यावर भर देणार," असे जगताप यांनी सांगितले.

माजी नगरसेवक मोरेश्वर भोंडवे, शिवसेना जिल्हाप्रमुख बाळासाहेब वाल्हेकर, माजी उपमहापौर सचिन चिंचवडे यांच्यासह अनेक कार्यकर्ते व पदाधिकारी उपस्थित होते.