"पिंपरी निवडणुकीसाठी मतदान यंत्रांची सज्जता; दोन दिवसांत पूर्ण होणार प्रक्रिया"

 

"३९८ मतदान केंद्रांसाठी ईव्हीएम-व्हीव्हीपॅट मशिन्स तयार"

पिंपरी - पिंपरी विधानसभा मतदारसंघाच्या पोटनिवडणुकीसाठी मतदान यंत्रांची (ईव्हीएम आणि व्हीव्हीपॅट) तयारी आजपासून सुरू झाली आहे. २० नोव्हेंबरला होणाऱ्या मतदानासाठी ही प्रक्रिया १४ नोव्हेंबरपर्यंत पूर्ण केली जाणार आहे.

जिल्हाधिकारी कार्यालयाकडून या मतदारसंघासाठी ४७७ बॅलेट युनिट, ४७७ कंट्रोल युनिट आणि ५१७ व्हीव्हीपॅट मशीन उपलब्ध करून देण्यात आल्या आहेत. एकूण ३९८ मतदान केंद्रांसाठी प्रत्येकी एक बॅलेट युनिट, एक कंट्रोल युनिट आणि एक व्हीव्हीपॅट यंत्र वाटप करण्यात आले असून, ७९ बॅलेट युनिट, ७९ कंट्रोल युनिट आणि ११९ व्हीव्हीपॅट यंत्रे राखीव ठेवण्यात आली आहेत.

सहायक निवडणूक निर्णय अधिकारी अर्चना यादव यांनी दिलेल्या माहितीनुसार, या कामासाठी सेक्टर ऑफिसर, मास्टर ट्रेनर आणि शिपाई अशा एकूण १३५ अधिकारी व कर्मचाऱ्यांची ४५ टेबलांवर नियुक्ती करण्यात आली आहे. तसेच ईव्हीएम संबंधित कामांसाठी अतिरिक्त १० अधिकारी व ४५ कर्मचाऱ्यांचे पथक नेमण्यात आले आहे.

मतदान यंत्र तयारीच्या प्रक्रियेबाबत सर्व उमेदवार आणि राजकीय पक्षांना कळवण्यात आले असून, या मतदारसंघात १५ उमेदवार रिंगणात आहेत. निवडणूक प्रक्रियेच्या सुरळीत अंमलबजावणीसाठी विविध अधिकाऱ्यांच्या विशेष जबाबदाऱ्या निश्चित करण्यात आल्या आहेत.