आमदारांनी महापालिकेला भ्रष्टाचाराचे कुरण केले - अमोल कोल्हे

 

पिंपरी : पिंपरी चिंचवड मधील तीनही आमदारांनी पिंपरी चिंचवड महानगरपालिकेला भ्रष्टाचाराचे कुरण केले आहे, असा आरोप खासदार डॉ. अमोल कोल्हे यांनी केला. या विधानसभा निवडणुकीत पिंपरी, चिंचवड व भोसरी मतदारसंघात महाविकास आघाडीतील राष्ट्रवादी काँग्रेस शरद पवार पक्षाच्या उमेदवारांना विजयी करण्याचे आवाहन करत त्यांनी महायुतीवर जोरदार हल्ला चढवला.

पिंपरी विधानसभा मतदारसंघात महाविकास आघाडीच्या घटक पक्षांच्या संवाद मेळाव्यात खासदार डॉ. अमोल कोल्हे बोलत होते. यावेळी शिवसेनेचे पुणे जिल्हा संपर्क नेते आमदार सचिन आहेर उपस्थित होते. कोल्हे म्हणाले की, ही निवडणूक केवळ विधानसभेची नसून महाराष्ट्राच्या दिशेला आकार देणारी निवडणूक आहे. "आमदार खरेदी करण्याचे उदाहरण महायुती सरकारने दाखवून दिले आहे," असे म्हणत त्यांनी टीका केली. 

"लोकसभा निवडणुकीत पराभव टाळण्यासाठी ‘बहिण लाडकी’ योजना आणली," असा टोला त्यांनी सरकारला लगावला. राज्यावर साडेआठ लाख कोटी रुपयांचे कर्ज असल्याची आठवणही त्यांनी यावेळी करून दिली. "रिंग रोड योजनेचा खर्च १८००० कोटी रुपयांवरून चाळीस हजार कोटींवर गेला असून हा भ्रष्टाचार मतदारांना ठाऊक आहे," असे ते म्हणाले.

महाविकास आघाडीतील राष्ट्रवादी काँग्रेसचे उमेदवार डॉ. सुलक्षणा शिलवंत यांचा विजय निश्चित असल्याचे सांगताना, कोल्हे यांनी कार्यकर्त्यांना सावध राहण्याचे आवाहन केले. "सुलक्षणा शिलवंत म्हणजे शरद पवार, उद्धव ठाकरे, आणि शाहू-फुले-आंबेडकर विचारांचे प्रतिनिधित्व करतात," असेही ते म्हणाले. 

माजी आमदार गौतम चाबुकस्वार यांनी विद्यमान आमदारांच्या कार्याविषयी प्रश्नचिन्ह उपस्थित करत "गैरप्रकार टाळण्यासाठी प्रत्येक कार्यकर्त्याने सतर्क राहावे," असे आवाहन केले.

यावेळी, राष्ट्रवादी काँग्रेसचे ज्येष्ठ नेते प्रकाश म्हस्के यांनी सांगितले की, सर्व घटक पक्षांना एकत्र ठेवून महाविकास आघाडीने भाजपाला हरविण्याचे ध्येय ठेवले आहे. 

कार्यकर्त्यांचा उत्स्फूर्त प्रतिसाद

संवाद मेळाव्यानंतर उमेदवार सुलक्षणा शिलवंत यांनी कार्यकर्त्यांना त्रिवार अभिवादन केले. त्यांच्या या अभिवादनामुळे सभागृहातील वातावरण भावपूर्ण झाले, आणि अनेक कार्यकर्त्यांच्या डोळ्यांत अश्रू तरळले.