रत्नागिरी जिल्ह्यात 65 टक्क्यांपर्यंत मतदान; मतदारांचा उत्स्फूर्त सहभाग

 

जिल्ह्यात मागील निवडणुकीपेक्षा साडेतीन टक्क्यांनी वाढले मतदान

 पाचही विधानसभा मतदारसंघात शांततापूर्ण मतदान; प्रशासनाचे यश

रत्नागिरी  : रत्नागिरी जिल्ह्यातील पाचही विधानसभा मतदारसंघांमध्ये शनिवारी झालेल्या मतदानात सरासरी 65 टक्के मतदान नोंदवले गेले. 2019 च्या विधानसभा निवडणुकीच्या तुलनेत यंदाच्या मतदानात साडेतीन टक्क्यांची लक्षणीय वाढ झाल्याची माहिती जिल्हा निवडणूक अधिकारी एम देवेंदर सिंह यांनी पत्रकार परिषदेत दिली.

सकाळी 7 वाजल्यापासूनच जिल्ह्यातील विविध मतदान केंद्रांवर मतदारांनी रांगा लावल्या होत्या. विधानसभा मतदारसंघनिहाय मतदानाचे प्रमाण पाहता चिपळूण मतदारसंघात सर्वाधिक 68.35 टक्के मतदान झाले. त्याखालोखाल दापोली मतदारसंघात 65.95 टक्के, गुहागर मतदारसंघात 62.5 टक्के, तर रत्नागिरी आणि राजापूर मतदारसंघात प्रत्येकी 63 टक्के मतदान नोंदवले गेले.

2019 च्या विधानसभा निवडणुकीत जिल्ह्याची सरासरी 61.22 टक्के होती. लोकसभा निवडणुकीत 59.77 टक्के, तर 2024 च्या लोकसभा निवडणुकीत 58.03 टक्के मतदान झाले होते. या पार्श्वभूमीवर यंदाच्या मतदानातील वाढ लक्षणीय मानली जात आहे.

प्रशासनाने उन्हाची तीव्रता लक्षात घेऊन सर्व मतदान केंद्रांवर मंडप, पिण्याच्या पाण्याची सोय केली होती. दिव्यांग मतदारांसाठी रॅम्प आणि व्हीलचेअरची व्यवस्था करण्यात आली होती. तसेच प्रत्येक मतदान केंद्रावर आरोग्य पथकेही तैनात करण्यात आली होती.

मतदानादरम्यान 2 बॅलेट युनिट (बीयु), 2 कंट्रोल युनिट (सीयु) आणि 5 व्हीव्हीपॅट यंत्रे तांत्रिक कारणांमुळे बदलण्यात आली. मात्र त्यामुळे मतदान प्रक्रियेत कोणताही अडथळा आला नाही.

राज्याचे विशेष सामान्य निरीक्षक राम मोहन मिश्रा, सामान्य निवडणूक निरीक्षक सुमित जरांगल व जनक प्रसाद पाठक, खर्च निरीक्षक पुरुषोत्तम कुमार आणि पोलीस निरीक्षक राजेंद्र प्रसाद मीना यांनी दिवसभर परिस्थितीवर बारकाईने लक्ष ठेवले. जिल्हा निवडणूक अधिकारी सिंह आणि पोलीस अधीक्षक धनंजय कुलकर्णी यांनीही विविध मतदान केंद्रांना भेटी देऊन व्यवस्थेचा आढावा घेतला.

जिल्हा प्रशासनाने राबवलेल्या मतदार जागृती मोहिमेला चांगला प्रतिसाद मिळाला. विशेषत: मच्छिमार बांधवांसाठी राबवलेल्या विशेष मोहिमेला त्यांनी दिलेल्या सकारात्मक प्रतिसादामुळे मतदानाचा टक्का वाढण्यास मदत झाली.

सर्व निवडणूक अधिकारी, सहाय्यक निवडणूक अधिकारी, कर्मचारी, पोलीस यंत्रणा आणि पत्रकार बंधू-भगिनींच्या सहकार्यामुळे मतदान शांततेत व सुरळीतपणे पार पडल्याबद्दल जिल्हा प्रशासनाने कृतज्ञता व्यक्त केली. तसेच उमेदवार व त्यांच्या कार्यकर्त्यांनीही निवडणूक आचारसंहितेचे काटेकोर पालन केल्याचे प्रशासनाने नमूद केले.