मध्य रेल्वेच्या पुणे विभागात दक्षता जनजागृती चर्चासत्राचे आयोजन

 

पुणे : भारताचे लोहपुरुष सरदार वल्लभभाई पटेल यांच्या जयंती निमित्त, मध्य रेल्वेने 28 ऑक्टोबर 2024 ते 3 नोव्हेंबर 2024 या कालावधीत “सत्यनिष्ठेच्या संस्कृतीतून राष्ट्र समृद्धी” या विषयाखाली दक्षता जागरूकता सप्ताह पाळण्याचे ठरविले आहे. याचाच एक भाग म्हणून, 16 ऑगस्ट 2024 ते 15 नोव्हेंबर 2024 या कालावधीत प्रतिबंधात्मक दक्षतेसाठी तीन महिन्यांची मोहीम राबविण्यात येत आहे. 

या तीन महिन्यांच्या मोहिमेचे मुख्य उद्दिष्ट क्षमता विकास कार्यक्रम, पद्धतशीर सुधारणा, परिपत्रके अद्यतन करणे, आणि डिजिटल उपस्थिती वाढवणे आहे.

या मोहिमेच्या पार्श्वभूमीवर 4 ऑक्टोबर 2024 रोजी पुणे विभागातील बांधकाम युनिट आणि वर्कशॉपमध्ये नियुक्त अधिकारी आणि कर्मचाऱ्यांच्या जागृतीसाठी दक्षता जनजागृती परिसंवाद आयोजित करण्यात आला होता. या सत्राचे नेतृत्व श्री. प्रतीक गोस्वामी, वरिष्ठ उपमहाव्यवस्थापक आणि मुख्य दक्षता अधिकारी यांनी केले.

सत्रात रेल्वे व्यवस्थेतील केस स्टडीज आणि प्रणाली सुधारणांबद्दल अधिकारी व कर्मचाऱ्यांना मार्गदर्शन करण्यात आले. त्याचबरोबर डीएआर (डिसीप्लिन अँड अपील रुल्स) आणि प्रतिबंधात्मक दक्षतेबाबतही जागरूकता निर्माण करण्यात आली.

श्री. प्रतीक गोस्वामी यांनी नैतिकतेवर आणि प्रशासनातील सचोटीवर विशेष भर दिला. त्यांनी रेल्वे प्रशासनात पारदर्शकता सुनिश्चित करण्यासाठी अधिकारी आणि कर्मचाऱ्यांना मार्गदर्शन केले. सहभागींना प्रामाणिकपणा आणि सचोटीचे महत्त्व पटवून देत त्यांनी स्पष्ट केले की, दक्षता ही भ्रष्टाचारावर नियंत्रण ठेवण्यासाठी अत्यंत आवश्यक आहे.

या सत्राचे आयोजन आणि त्याचे महत्त्व लक्षात घेऊन पुणे विभागातील अधिकारी आणि कर्मचारी या चर्चासत्रात मोठ्या संख्येने उपस्थित होते.