कृत्रिम बुद्धिमत्ता वीजेप्रमाणे सार्वत्रिक होणार : डॉ. भूषण गरवारे

पुणे : भारती विद्यापीठाच्या कॉलेज ऑफ इंजिनिअरिंगमध्ये 'लार्ज लँग्वेज मॉडेलिंग: कृत्रिम बुद्धिमत्तेचे पुढचे पर्व' या विषयावर आधारित एक आठवड्याच्या फॅकल्टी डेव्हलपमेंट प्रोग्रॅमचे उद्घाटन झाले. या कार्यक्रमाचे उद्घाटक म्हणून गुगलचे एआय क्लाउड मायग्रेशन कन्सल्टंट डॉ. भूषण गरवारे उपस्थित होते.

डॉ. गरवारे यांनी सांगितले की, कृत्रिम बुद्धिमत्तेतील शोध आता दैनंदिन जीवनाचा एक भाग बनला आहे. सध्याचे नोबेल पारितोषिक भौतिकशास्त्र आणि रसायनशास्त्रामध्ये कृत्रिम बुद्धिमत्तेच्या मदतीने महत्त्वपूर्ण शोध लावणाऱ्या संशोधकांना दिले गेले आहे. मात्र, कृत्रिम बुद्धिमत्तेच्या वाढीच्या गतीशी जुळवून घेणे आव्हानात्मक आहे.

त्यांनी पुढे सांगितले की, कृत्रिम बुद्धिमत्तेमुळे रोजगाराच्या संधी कमी होणार नाहीत, परंतु कामाचे स्वरूप बदलणार आहे. फक्त अल्गोरिदमची अंमलबजावणी पुरेशी ठरणार नाही. कृत्रिम बुद्धिमत्तेची विध्वंसक शक्ती नियंत्रणात ठेवण्यासाठी शिक्षण संस्थांची भूमिका महत्त्वपूर्ण ठरणार आहे. त्यामुळे जबाबदार कृत्रिम बुद्धिमत्ता विकसित होऊ शकेल.

या प्रशिक्षण कार्यक्रमात उद्योग विश्वातील तज्ज्ञांची १० सत्रे आयोजित करण्यात आली आहेत, ज्यामध्ये प्रत्यक्ष कार्यानुभव देखील दिला जाणार आहे. हे प्रशिक्षण कार्यक्रम हायब्रीड मोडमध्ये म्हणजे ऑनलाइन आणि ऑफलाइन सत्रांच्या मिश्रणात घेतले जाणार आहे.

प्राचार्या डॉ. विदुला सोहोनी यांनी संस्थेच्या रँकिंग, पुरस्कार आणि यशांविषयी माहिती दिली. त्या म्हणाल्या, "आम्ही नेहमी अशा प्रकारच्या प्रशिक्षण कार्यक्रमांचे आयोजन करतो, जे उद्योग आणि शिक्षण संस्थांमधील संवाद वाढवण्यास, संशोधन क्षमतांचे वृद्धीकरण करण्यास आणि विद्यार्थ्यांमध्ये नवीनतम ट्रेंड पोहोचवण्यासाठी उपयुक्त ठरतात."

कार्यक्रमास उपप्राचार्या डॉ. सुनीता जाधव, उपप्राचार्य डॉ. सचिन चव्हाण, अधिष्ठाता डॉ. सुहास पाटील, आयटी विभाग प्रमुख डॉ. संदीप वांजळे, समन्वयक डॉ. प्रियांका पायगुडे आणि डॉ. मिलिंद गायकवाड उपस्थित होते.