जैतापूर आरोग्य केंद्राचे भूमिपूजन

 

रत्नागिरी :  महिलांना त्यांच्या आरोग्याची काळजी घेण्यासाठी सोयीस्कर व्हावे, यासाठी जैतापूर प्राथमिक आरोग्य केंद्रातील ओपीडी संध्याकाळी 4 ते 6 या वेळेत सुरू ठेवण्याचे आवाहन पालकमंत्री उदय सामंत यांनी केले. 

मंगळवारी 6 कोटी 22 लाख रुपये खर्च करुन बांधण्यात येणाऱ्या जैतापूर प्राथमिक आरोग्य केंद्राचे भूमिपूजन पालकमंत्र्यांच्या हस्ते झाले. यावेळी ते बोलत होते. 

"महिला त्यांच्या दैनंदिन कामकाजात सकाळच्या वेळी व्यस्त असतात. त्यामुळे सकाळच्या ओपीडी बरोबर संध्याकाळी 4 ते 6 या वेळेत ओपीडी सुरू ठेवली पाहिजे, त्याचा महिलांना फायदा होईल," असे श्री. सामंत म्हणाले. 

त्यांनी या आरोग्य केंद्राचे काम एक वर्षाच्या आत पूर्ण करण्याचे निर्देशही अधिकाऱ्यांना दिले. 

श्री. सामंत म्हणाले, लांजा राजापूर मतदार संघात गेल्या तीन-चार महिन्यात आरोग्य विभागाने क्रांतिकारक निर्णय घेतले आहेत. यामध्ये लांजा रुग्णालय स्थलांतर असेल वा नवीन रुग्णालयाचे बांधकाम सुरुवात, राजापूर ग्रामीण रुग्णालयात चांगली सुविधा उपलब्ध करून देणे, 56 कोटी रुपये खर्चुन बांधण्यात येत असलेले मल्टीस्पेशालिटी हॉस्पिटल, तसेच भांबेड प्राथमिक आरोग्य केंद्र साडेसहा कोटी रुपये खर्चून बांधण्यात येत आहे. रत्नागिरीच्या धर्तीवर राजापूर येथे जानेवारीमध्ये कॅशलेस हॉस्पिटल सुरू केले जाईल, असा शब्दही त्यांनी यावेळी दिला. यासोबतच पाणी प्रश्न धरणाच्या कामाचे प्रश्नही मार्गी लावण्यात आल्याचे ते म्हणाले.

प्रकल्पाबाबत आंदोलन केलेल्या आंदोलकांवरील गुन्हे मागे घेण्यात यश आले आहे. कोणत्याही प्रकल्पाबाबत ग्रामस्थांच्या मनातील गैरसमज दूर करून, ग्रामस्थांना विश्वासात घेऊनच प्रकल्प बाबत निर्णय घेण्यात येईल. शेतकरी हा आमचा केंद्रबिंदू आहे, कणा आहे, त्याच्याविरोधात जाऊन कोणतीही भूमिका घेण्यात येणार नाही, असेही ते म्हणाले.

माझी लाडकी बहीण योजनेबाबत बोलताना ते म्हणाले, या योजनेचे तीन हप्ते जमा झाले आहेत. माहे ऑक्टोबर व नोव्हेंबर महिन्याचा हप्ताही आचारसंहितेपूर्वी तुमच्या खात्यात जमा होईल. कोणत्याही परिस्थितीत ही योजना बंद होणार नाही असा शब्द पालकमंत्र्यांनी दिला. 

कार्यक्रमासाठी मोठ्या संख्येने नागरिक उपस्थित होते. कार्यक्रमाच्या सुरुवातीला छत्रपती शिवाजी महाराज अणि धन्वंतरीचे पूजन करण्यात आले.