प्रवासी हितासाठी शासन निष्क्रिय: सुराज्य अभियानाचा आरोप

 

दिवाळीपूर्वी खासगी बस तिकीट दरवाढ; तक्रार क्रमांक बंद

मुंबई :  दिवाळीच्या आगमनापूर्वी खासगी प्रवासी बस चालकांकडून तिकीट दरांमध्ये वाढ करण्यात आली आहे. हिंदु जनजागृती समितीच्या 'सुराज्य अभियाना'चे महाराष्ट्र राज्य समन्वयक श्री. अभिषेक मुरुकटे यांनी या संदर्भात महाराष्ट्र राज्य परिवहन आयुक्तांना निवेदन दिले आहे.

मुरुकटे यांनी सांगितले की, २०१८ मध्ये राज्य शासनाने प्रवासी बसचे तिकिटदर निश्चित केले होते. परंतु ६ वर्षांनंतरही परिस्थितीत बदल झालेला नाही. 

शासनाने अधिक तिकीटदर आकारणाऱ्या खासगी बस चालकांच्या विरुद्ध तक्रार करण्यासाठी दोन संपर्क क्रमांक दिले होते - (०२२) ६२४२६६६६ आणि १८००२२०११०. हे दोन्ही क्रमांक सध्या बंद स्थितीत आहेत.

काही प्रादेशिक परिवहन कार्यालयांनी तक्रार करण्यासाठी व्हॉट्सॲप हेल्पलाइन क्रमांक जाहीर केले आहेत. मात्र, सर्व कार्यालयांनी असे केलेले नाही.

'सुराज्य अभियान'ने मागणी केली आहे की:

1. तक्रार क्रमांक तत्काळ सुरू करावेत आणि ते २४ तास कार्यरत ठेवावेत.

2. बेजबाबदार अधिकाऱ्यांवर कारवाई करावी.

'महाराष्ट्र रेग्युलेशन्स ऑफ एग्रिगेटर रुल्स २०२२' तयार करण्यासाठी ५ एप्रिल २०२३ रोजी एक समिती गठित करण्यात आली होती. या समितीचा अहवाल अद्याप सादर झालेला नाही.

मुरुकटे यांनी म्हटले की, 'सुराज्य अभियान'ने यापूर्वी अनेकदा परिवहन विभाग आणि राज्य शासनाकडे या विषयावर पत्र, ई-मेल, ट्विटर आणि प्रत्यक्ष भेटीद्वारे संवाद साधला आहे. तरीही, प्रश्न अनुत्तरितच राहिले आहेत.