महा ई सेवा केंद्रातील लाचखोरी प्रकरणी दोघांवर कारवाई

 

पुणे : पुण्यातील दिघी येथील महा ई-सेवा केंद्रात उत्पन्नाचा दाखला आणि डोमिसाईल सर्टिफिकेसाठी लाच मागणी आणि स्वीकारण्याच्या प्रकरणी दोन व्यक्तींवर कारवाई करण्यात आली आहे. लाचलुचपत प्रतिबंधक विभागाने ही कारवाई केली असून, याप्रकरणी दिघी पोलीस स्टेशनमध्ये गुन्हा दाखल करण्यात आला आहे.

प्राप्त माहितीनुसार, ५४ वर्षीय तक्रारदाराने उत्पन्नाचा दाखला आणि डोमिसाईल सर्टिफिकेट काढण्यासाठी गुरुदेव दत्त महा-ई-सेवा केंद्रात संपर्क साधला होता. या केंद्राचे चालक संतोष बबन वाळके (४८) आणि कॉम्प्युटर ऑपरेटर नंदा राजू शिवरकर (३६) यांनी तक्रारदाराकडे ५ हजार रुपयांची लाच मागितली होती.

तक्रारदाराने या प्रकरणाची माहिती लाचलुचपत प्रतिबंधक विभागाकडे दिली. त्यानंतर पंचासमक्ष पडताळणी करण्यात आली. या पडताळणीदरम्यान, श्रीमती शिवरकर यांनी तक्रारदाराकडून २ हजार ५०० रुपये स्वीकारले. त्यानंतर दोन्ही आरोपींना ताब्यात घेण्यात आले.

या प्रकरणी भ्रष्टाचार प्रतिबंध अधिनियम, १९८८ अंतर्गत गुन्हा दाखल करण्यात आला असून, पोलीस निरीक्षक विरनाथ माने तपास करत आहेत. ही कारवाई पोलीस उप आयुक्त श्री. शिरीष सरदेशपांडे आणि अपर पोलीस अधीक्षक डॉ. शीतल जानवे यांच्या मार्गदर्शनाखाली करण्यात आली.