कोंढवा बेकायदा टेलिफोन एक्सचेंज प्रकरण; एटीएसकडून तीन आरोपी अटकेत

पुणे :  कोंढवा भागातील बनावट टेलिफोन एक्सचेंज प्रकरण उघडकीस आल्यानंतर दहशतवाद विरोधी पथकाने (ATS) मोठी कारवाई करत तीन आरोपींना अटक केली आहे. या प्रकरणातील आरोपी आंतरराष्ट्रीय कॉल्सद्वारे शासनाची फसवणूक करत होते, तसेच त्यातून आर्थिक लाभ घेत होते.

पुण्यातील कोंढवा भागात मिठा नगर येथे एम.ए. कॉम्प्लेक्स परिसरात बनावट टेलिफोन एक्सचेंज सुरू असल्याची माहिती ATS ला मिळाली होती. या एक्सचेंजच्या माध्यमातून विदेशातून येणारे आंतरराष्ट्रीय कॉल भारतातील यंत्रणेला कोणताही अंदाज येऊ न देता भारतीय नेटवर्कवर ट्रांसफर केले जात होते. यामुळे सरकारला मोठ्या प्रमाणात आर्थिक फटका बसला होता. 

ATS ने छापेमारी करत नौशाद अहमद सिद्दिकी उर्फ कुमार (वय 32), मोहम्मद उजेर शौकत अली अन्सारी उर्फ सोनू (वय 29), आणि पियुष सुभाषराव गजभिये (वय 29) यांना अटक केली आहे. या छाप्यात 3788 सिम कार्ड्स, 8 राउटर्स आणि अन्य बेकायदा उपकरणे जप्त करण्यात आली आहेत. आरोपी हे आंतरराष्ट्रीय कॉल्सचे बेकायदेशीर एक्सचेंज चालवत होते. पोलिसांनी याच प्रकरणात आरोपींना पोलीस कोठडीत ठेवून अधिक तपास सुरू केला आहे.

आता तपासात या आरोपींनी हे उपकरणे कुठून आणली, त्यांच्या इतर साथीदारांची माहिती आणि आंतरराष्ट्रीय कनेक्शनचा शोध घेण्यावर पोलिसांचे लक्ष आहे. याशिवाय, या प्रकरणात काही दहशतवादाचा अँगल आहे का, हेही तपासले जाणार आहे. सरकारी वकील बोधिनी शशीकर यांनी आरोपींना पोलीस कोठडीत ठेवून अधिक तपास करण्याची मागणी केली. न्यायालयाने या मागणीला मान्यता देऊन आरोपींना 6 सप्टेंबरपर्यंत पोलीस कोठडीत ठेवण्याचे आदेश दिले आहेत.

अटक झालेल्या तिघांमध्ये नौशाद आणि सोनू हे आठवी पास आहेत, तर पियुषने संगणक डिप्लोमा केला आहे. तिघे पूर्वी भिवंडीमध्ये राहत होते आणि एकमेकांचे मित्र आहेत. नौशाद कोंढव्यात भाड्याच्या घरात राहत होता आणि या ठिकाणी बनावट टेलिफोन एक्सचेंजचे संचालन करत होता.

कोंढवा बनावट टेलिफोन एक्सचेंज प्रकरणात पोलिसांनी केलेली कारवाई महत्त्वपूर्ण ठरली आहे. आरोपींचा आंतरराष्ट्रीय नेटवर्कशी संबंध असल्याचे स्पष्ट झाले असून, यामुळे देशातील सुरक्षा यंत्रणा अधिक सतर्क झाली आहे. पोलीस आता या प्रकरणाचा सखोल तपास करत आहेत, ज्यामुळे या गुन्ह्यातील इतर आरोपींचा शोध घेणे सोपे होईल.