उलवे येथे सेल्फडिफेन्स कार्यक्रमाला महीलांचा प्रचंड प्रतिसाद

 

विठ्ठल ममताबादे 

उरण : महिलांवरील वाढते अत्याचार लक्षात घेता, त्यांच्या स्वसंरक्षणासाठी उलवे येथे आयोजित केलेल्या सेल्फडिफेन्स कार्यक्रमाला महिलांचा प्रचंड प्रतिसाद मिळाला. एआयओसीडी आणि एमएससीडीए संघटनेच्या वतीने आयोजित या कार्यक्रमात महिलांना आत्मरक्षणाचे धडे देण्यात आले.

संघटनेचे अखिल भारतीय अध्यक्ष अप्पासाहेब शिंदे यांच्या नेतृत्वाखाली आणि रायगड जिल्हाध्यक्ष लीलाधर पाटील व सचिव प्रवीण नावानंदार यांच्या मार्गदर्शनाखाली हा कार्यक्रम किंडर गार्डन स्कूल, सेक्टर २ उलवे येथे आयोजित करण्यात आला होता. वहाळ ग्रामपंचायत सदस्य तथा भाजपा युवा नेते वितेश म्हात्रे, दीपिका म्हात्रे आणि किंडर गार्डन प्रिंसिपल ऋचा सिंग यांचे या कार्यक्रमाला विशेष सहकार्य लाभले.

राष्ट्रीय पुरस्कार प्राप्त मार्शल आर्ट्स प्रशिक्षक अनिकेत जाधव, प्रतीक भेंग्रा आणि त्यांच्या टीमने महिलांना स्वसंरक्षणाचे प्रात्यक्षिक दाखवले. या कार्यक्रमामुळे महिलांमध्ये आत्मविश्वास वाढल्याचे दिसून आले.

केमिस्ट असोसिएशन उलवेच्या अध्यक्षा सीमा पाटील यांनी या वेळी महिलांना संबोधित करताना सांगितले की, "अन्यायाला नेहमी विरोध करा, अन्याय सहन करू नका." त्यांनी व्यक्त केलेल्या मतानुसार या प्रशिक्षणाचा महिलांना भविष्यात निश्चितच फायदा होईल.

कार्यक्रमाच्या यशस्वी आयोजनासाठी किरण जाधव, प्रिया पवार, शर्वरी पवार, आशा चव्हाण, चांदणी शेख, गोविंद जाधव, रणजित मिश्रा, वर्षा चासकर, शकुंतला लोधी आणि श्रीनिधी पाटील यांनी विशेष परिश्रम घेतले. निकिता गाडघे यांनी सर्वांसाठी नाश्त्याची व्यवस्था केली होती.

उपस्थित महिलांनी कार्यक्रमाच्या उत्तम आयोजनाबद्दल आयोजक आणि मान्यवरांचे आभार मानले. एकूणच या कार्यक्रमामुळे महिलांमध्ये स्वसंरक्षणाबद्दल जागृती निर्माण झाली असून, त्यांच्या आत्मविश्वासात वाढ झाल्याचे दिसून आले.