मुंबई : महाराष्ट्र राज्य महानगरपालिका कामगार कर्मचारी संघटना फेडरेशन २८ ऑगस्ट २०२४ रोजी मुंबईतील आझाद मैदानावर धरणे निदर्शने आंदोलन करणार आहे. राज्यातील महानगरपालिकांच्या कायम व कंत्राटी कामगारांच्या विविध प्रलंबित मागण्यांसाठी हे आंदोलन होत आहे.
फेडरेशनचे अध्यक्ष श्री. शशिकांत उर्फ बबनराव झिंजुर्डे यांनी दिलेल्या माहितीनुसार, राज्य शासनाकडे अनेकदा निवेदने देऊनही कामगारांच्या मागण्यांची पूर्तता झालेली नाही. २३ फेब्रुवारी २०२३ रोजी मुख्यमंत्र्यांसोबत झालेल्या बैठकीतील आश्वासनांचीही अंमलबजावणी झालेली नाही.
प्रमुख मागण्यांमध्ये पुढील मागण्यांचा समावेश आहे.
- 'ड' वर्ग महानगरपालिका कर्मचाऱ्यांना १००% वेतन अनुदान
- जुनी पेन्शन योजना लागू करणे
- रोजंदारी कर्मचाऱ्यांना कायम करणे
- दिवाळी बोनस व सानुग्रह अनुदान
- कंत्राटी कामगारांना कायम करणे किंवा समान वेतन देणे
- वारसा हक्काने नेमणुका करणे
- सातव्या वेतन आयोगाच्या फरकाची रक्कम अदा करणे
फेडरेशनने चेतावणी दिली आहे की मागण्यांकडे दुर्लक्ष झाल्यास संपूर्ण राज्यातील महानगरपालिकांमधील अत्यावश्यक सेवांसह इतर कामकाज बंद करण्याचे तीव्र आंदोलन करण्यात येईल.
या निवेदनावर अशोक जाधव, गणेश शिंगे, गौतम खरात यांच्यासह अनेक पदाधिकाऱ्यांनी स्वाक्षऱ्या केल्या आहेत.
Reviewed by ANN news network
on
८/२६/२०२४ ०३:४८:०० PM
Rating:
कोणत्याही टिप्पण्या नाहीत: