उरणमध्ये बदलापूरमधील अत्याचाराच्या निषेधार्थ महाविकास आघाडीचे जनआक्रोश आंदोलन

विठ्ठल ममताबादे

उरण: बदलापूरमधील एका नामांकित शाळेत दोन लहान मुलींवर झालेल्या लैंगिक अत्याचाराच्या निषेधार्थ महाविकास आघाडीने उरणमधील गांधी चौकात जनआक्रोश आंदोलन आयोजित केले. या आंदोलनात राज्यात आणि देशात महिलांवर होत असलेल्या अत्याचारांनाही विरोध दर्शवण्यात आला.

बदलापूरमध्ये दोन लहान मुलींवर लैंगिक अत्याचार झाल्याने स्थानिक नागरिकांचा संताप  वाढला आहे. दोन मुलींपैकी एक तीन वर्षांची आहे तर दुसरी सहा वर्षांची आहे. या घटनेनंतर बदलापूरमध्ये आक्रोश वाढला असून, आरोपीला फाशीची मागणी केली जात आहे. घटनानंतर पोलिसांनी तक्रार घेण्यात अनाग्रहीपणा दाखविला आणि आरोपीच्या नातलग असल्याने शाळेनेही तक्रार धुडकावून लावली, यामुळे जनतेत अधिक संताप निर्माण झाला.

उरणमध्ये आयोजित जनआक्रोश आंदोलनात महिलांवरील अत्याचारांचे आणि बदलापूरमधील घटनेचे तीव्र निषेध व्यक्त करण्यात आले. आंदोलनात सहभागी झालेल्या लोकांनी राज्य सरकारवर आरोप करत विद्यमान मुख्यमंत्री एकनाथ शिंदे, उपमुख्यमंत्री अजित पवार, आणि उपमुख्यमंत्री देवेंद्र फडणवीस यांची राजीनाम्याची मागणी केली. शेतकरी कामगार पक्षाचे नेते काका पाटील, महादेव बंडा आणि अन्य वरिष्ठ नेत्यांनी उपस्थित राहून सरकारच्या निष्काळजीपणाचा विरोध केला.

जनआक्रोश आंदोलनात साहित्यिक एल. बी. पाटील, शिवसेनेचे रायगड जिल्हा प्रमुख मनोहर भोईर, राष्ट्रवादी काँग्रेस पार्टीच्या महाराष्ट्र प्रदेश सरचिटणीस भावना घाणेकर, शेतकरी कामगार पक्षाच्या उरण महिला तालुका अध्यक्ष सीमा घरत, आणि अन्य प्रमुख नेत्यांनी सहभाग घेतला. त्यांनी महिलांच्या सुरक्षा, आरोपींविरुद्ध कठोर कारवाई, आणि दोषी व्यक्तींना तातडीने फाशी देण्याची मागणी केली.