८१ हजार रुपयांची लाच घेताना दुय्यम निबंधकासह दोघे अटकेत!

 

नांदेड : वीस गुंठे जमिनीचे खरेदीखत नोंदविण्यासाठी १ लाख ९९ हजार रुपयांची लाच मागून ८१ हजार ६०० रुपयांची स्वीकारणार्‍या हदगाव येथील दुय्यम निबंधकासह बॉन्डरायटर आणि स्टॅम्पव्हेंडर अशा तिघांना नांदेड येथील अ‍ॅन्टीकरप्शन ब्युरो कार्यालयाच्या पथकाने १२ जुलै रोजी सायंकाळी पकडले.

बालाजी शंकरराव उत्तरवार असे दुय्यम निबंधकाचे नाव असून शमिउल्ला बरकतउल्ला शेख उर्फ शमी आणि शेख अबुबकर करीम सिद्धीकी उर्फ बाबू अशी अन्य दोघांची नावे आहेत. या प्रकरणी हदगाव पोलीसठाण्यात १८१/२०२४ क्रमांकाने गुन्हा दाखल करण्यात आला आहे.

या प्रकरणातील तक्रारदाराने हदगाव येथील गट क्रमांक २५६-२ मध्ये २० गुंठे शेतजमीन खरेदी केली होती. तिचे खरेदीखत नोंदविण्यासाठी ते हदगाव येथील दुय्यम निबंधक बालाजी उत्तरवार यांना भेटले. त्यांनी तक्रारदाराकडे नोंदणी व मुद्रांक फीसह लाच अशी एकूण १ लाख ९९ हजार रुपयांची मागणी केली. पण तडजोडीअंती १ लाख ९५ हजार देण्याचे ठरले. उत्तरवार यांनी ही रक्कम दुय्यम निबंधक कार्यालयात काम करणारे मुद्रांक विक्रेता समीउल्ला अजमतउल्ला शेख यांच्याकडे देण्यास सांगितले.

तक्रारदाराने नांदेड येथील अ‍ॅन्टीकरप्शन खात्याच्या कार्यालयाकडे १२ जुलै रोजी तक्रार दिली. त्यावरून उपनिबंधक कार्यालय आवारात सापळा लावण्यात आला.यावेळी समीउल्ला शेख यांनी १ लाख ९५ हजारांची लाच  स्वीकारून आरोपी शेख अबूबकर याच्याजवळ दिली. त्यानंतर नोंदणी व मुद्रांक फी भरल्याची १ लाख १३ हजार ४०० रुपयांची पावती दिली. याप्रकरणात उत्तरवार यांनी नोंदणी व मुद्रांक फीच्या नावाखाली ८१ हजार ६०० रुपयांची लाच समीउल्ला यांच्यामार्फत स्वीकारल्याचे दिसून आल्याने या तिघांनाही अटक करण्यात आली. रात्री उशिरापर्यंत हदगाव पोलिस ठाण्यात गुन्हा दाखल करण्याची प्रक्रिया सुरू होती. 

ही कारवाई पोलीस अधीक्षक डॉ. राजकुमार शिंदे यांच्या मार्गदर्शनाखाली उपअधीक्षक प्रशांत पवार, निरीक्षक प्रीती जाधव यांनी केली.