महाविकास आघाडीमुळेच मराठा आरक्षण रद्द झाले : देवेंद्र फडणवीस

पुणे :  मराठा आरक्षणाच्या मुद्द्यावरून राज्यातील राजकीय वातावरण तापले आहे. भाजपाचे नेते आणि राज्याचे उपमुख्यमंत्री देवेंद्र फडणवीस यांनी महाविकास आघाडीवर टीका केली आहे.

देवेंद्र फडणवीसांची टीका

**. पुण्यात भाजपाच्या मेळाव्यात बोलताना फडणवीस म्हणाले की,** "भारतीय जनता पक्षाने मराठा आरक्षणाबाबत नेहमीच स्पष्ट भूमिका घेतली आहे. मराठा समाजातील गरीबांना आरक्षण मिळाले पाहिजे, असे आमचे मत आहे. आरक्षणाची लढाई १९८२ साली सुरू झाली होती. त्यावेळी अण्णासाहेब पाटील यांनी काँग्रेसच्या मुख्यमंत्र्यांना आरक्षण मागितले होते, परंतु त्यांनी आरक्षण दिले नाही. तेव्हापासून आजपर्यंत अनेक सरकारे आली, शरद पवार हे चार वेळा मुख्यमंत्री होते, परंतु त्यांनीही आरक्षण दिले नाही."

उद्धव ठाकरे सरकारवर आरोप

**फडणवीस यांनी उद्धव ठाकरे सरकारवर आरोप करताना म्हटले की,** "आम्ही मराठा समाजाला आरक्षण दिले होते. उच्च न्यायालयात ते आरक्षण टीकवले आणि सर्वोच्च न्यायालयातदेखील प्रकरण दाखल केले. परंतु जोपर्यंत आम्ही सत्तेत होतो, सर्वोच्च न्यायालयाने तीनवेळा मराठा आरक्षणाला स्थगिती देण्यास नकार दिला होता. पण दुर्दैवाने, उद्धव ठाकरेंच्या नेतृत्वाखाली महाविकास आघाडीचे सरकार आले आणि मराठा आरक्षण रद्द झाले."

मराठा आरक्षणावरून राजकारण

**फडणवीस यांनी मराठा आरक्षणावरून राजकारण होणे दुर्दैवी असल्याचे म्हटले.** "एकनाथ शिंदे यांचे सरकार आल्यानंतर आम्ही मराठा समाजाला १० टक्के आरक्षण दिले. पोलीस भरतीत हजारो मराठा तरुणांना नोकरी लागली आहे. तरीही मराठा आरक्षणाचे राजकारण सुरू आहे, हे दुर्दैवी आहे," असे त्यांनी नमूद केले.

 मविआवर दुटप्पी भूमिकेचा आरोप

**फडणवीस यांनी महाविकास आघाडीवर दुटप्पी भूमिकेचा आरोप करताना म्हटले की,** "मराठा आरक्षणासाठी आंदोलन सुरू आहे. उद्धव ठाकरे, शरद पवार आणि नाना पटोले यांनी मराठा आरक्षणाबाबतची त्यांची भूमिका स्पष्ट करावी. मराठ्यांना ओबीसीतून आरक्षण देणे मंजूर आहे का, हे त्यांनी सांगावे. महाविकास आघाडीचे तिन्ही नेते आरक्षणाबाबत दुटप्पी भूमिका घेत आहेत. मराठा आणि ओबीसी समाजाला झुलवत ठेवण्याचे काम महाविकास आघाडी करत आहे. महाविकास आघाडीचा बुरखा फाडल्याशिवाय आम्ही राहणार नाही," असा इशाराही फडणवीस यांनी दिला.