फूटपाथवर खाद्यपदार्थ विकणार्‍यांवर कर्नाटक सरकारची वक्रदृष्टी

 

बेंगळुरू: अलीकडे कर्नाटकमध्ये फूटपाथवर गोबी मंचुरियन, पाणीपुरी आणि इतर खाद्यपदार्थांची विक्री करणार्‍यांविरोधात सरकारने मोठी मोहीम उघडली आहे. ४ हजार विक्रेत्यांच्या खाद्यपदार्थांचे नमुने घेण्यात आले असून २८४ विक्रेत्यांवर अन्नभेसळ प्रतिबंधक कायद्याखाली कारवाई करण्यात आली आहे. यात दोषी आढळणार्‍या विक्रेत्यांवर १० लाख रुपये दंड आणि  ७ वर्षे सक्तमजुरीची कारवाई होऊ शकते.

खाद्यपदार्थात वापरल्या जाणार्‍या कृत्रिम रंगांमुळे ही कारवाई सुरू झाली आहे.या कृत्रिम रंगांमुळे कर्करोगासारख्या गंभीर आजारांसह आरोग्याच्या समस्या निर्माण होत असल्याने हा त्रास थांबवण्यासाठी सरकारने हे पाऊल उचलले आहे.

कारवाईचे कारण

रस्त्यावरील खाद्यपदार्थ विक्रेत्यांकडे पदार्थांचा आस्वाद घेतल्यानंतर ग्राहकांना उलट्या, जुलाब आणि इतर आरोग्य समस्यांचा सामना करावा लागत असल्याच्या तक्रारी कर्नाटक अन्न सुरक्षा विभागाकडे वारंवार येत होत्या. त्यामुळे गेल्या पाच महिन्यांत ४ हजारहून अधिक अन्नाचे नमुने गोळा करून त्यांची चाचणी करण्यात आली.

कृत्रिम रंगांचे धोके

रस्त्यावरील खाद्यपदार्थांमध्ये वापरले जाणारे कृत्रिम रंग, जसे की टार्टारिन, सनसेट यलो आणि रोडमास्टर रंग आरोग्यासाठी घातक असू शकतात. यातून कर्करोग, मधुमेह, मूत्रपिंड निकामी होणे,डोळ्यांचे नुकसान  अशा समस्या निर्माण होतात.

कारवाईचे उपाय

कर्नाटक अन्न सुरक्षा आणि मानक आयुक्तालयाचे आयुक्त श्रीनिवास के यांनी सांगितले की, तीन आदेश जारी करण्यात आले आहेत ज्यात या हानिकारक रंगांवर बंदी घालण्यात आली आहे. आता विक्रेत्यांना नैसर्गिक रंग वापरावे लागणार आहेत.

कायदेशीर कारवाई

अन्नाचे नमुने सर्वेक्षण नमुने आणि कायदेशीर नमुने म्हणून गोळा केले जातात. नमुना असुरक्षित आढळल्यास खाद्यपदार्थ व्यवसाय करणाऱ्या चालकावर गुन्हा दाखल केला जातो. या प्रकरणाची सुनावणी प्रथमवर्ग न्यायदंडाधिकारी न्यायालयात चालते आणि दोषी आढळल्यास १० लाख रुपयांपर्यंत दंड आणि ७ वर्षांपर्यंत कारावास होऊ शकतो. कर्नाटक सरकारच्या या उपक्रमाचा मुख्य उद्देश लोकांना सुरक्षित आणि सकस आहार मिळावा हा आहे. 

नैसर्गिक रंगाचा पर्याय

कृत्रिम रंगांऐवजी नैसर्गिक रंगांचा वापर हा एक चांगला पर्याय आहे आणि आपण त्याचा प्रचार केला पाहिजे. नैसर्गिक रंग वापरता येतात. जसे:

पालक(हिरवा)

टोमॅटो(लाल)

बीटरूट(गुलाबी/लाल)

बेरी(निळा/जांभळा)

हे नैसर्गिक पर्याय केवळ सुरक्षितच नाहीत तर आरोग्यासाठीही फायदेशीर आहेत. तुम्ही रस्त्यावरील खाद्यपदार्थांचे सेवन करता तेव्हा त्यात वापरलेले रंग हानिकारक नाहीत ना याची खात्री करा.