विशाळगडावरील अतिक्रमण प्रकरण; जिल्हाधिकार्‍यांवर कारवाईची मागणी

 

विशाळगड रक्षण आणि अतिक्रमणविरोधी कृती समितीचे गंभीर आरोप

कोल्हापूर:विशाळगडावरील अतिक्रमण प्रकरणात हिंदुत्वनिष्ठांची दिशाभूल करणाऱ्या तत्कालीन जिल्हाधिकारी राहुल रेखावार यांच्यावर शासनाने कठोर कारवाई करावी, अशी मागणी विशाळगड रक्षण आणि अतिक्रमणविरोधी कृती समितीने केली आहे. १४ जुलैला शिवभक्तांच्या उद्रेकानंतर प्रशासनाने १५ जुलैला अतिक्रमण काढण्यास प्रारंभ केला, परंतु यापूर्वी प्रशासनाने न्यायालयीन प्रकरणाचा हवाला देत अतिक्रमण काढण्यास टाळाटाळ केली होती असा आरोप समितीच्यावतीने करण्यात आला आहे.

अतिक्रमण प्रकरणाची पार्श्वभूमी

विशाळगडावरील अतिक्रमणांच्या संदर्भात शासकीय महाभियोक्ता यांचा अभिप्राय मागवला असता, उच्च न्यायालयात आणि इतर न्यायालयात ज्या याचिकाकर्त्यांचा स्थगन आदेश आहे, ती वगळून इतर अतिक्रमणे काढता येतील, असे स्पष्ट करण्यात आले. तथापि, जिल्हा प्रशासनाने या अतिक्रमणांना वेळोवेळी न्यायालयीन प्रकरणाचे कारण सांगून ढकलले. स्थानिक न्यायालयाने अतिक्रमण काढण्याचा आदेश दिलेल्या असतानाही, जिल्हाधिकारी राहुल रेखावार यांनी अतिक्रमण काढण्यास दिरंगाई केली, असे समितीचे म्हणणे आहे.

जिल्हाधिकार्‍यांवर आरोप

समितीने आरोप केला की, पूर्वीच्या वादामुळे जिल्हाधिकारी राहुल रेखावार यांनी अतिक्रमण काढण्यासाठी टाळाटाळ केली आणि त्यामुळे याचिकाकर्त्यांना न्यायालयात जाण्यासाठी पुरेसा अवधी मिळाला. तसेच, पावसाळ्यात अतिक्रमण काढता येत नाही, असे सांगून जिल्हाधिकारी रेखावार यांनी जनतेची दिशाभूल केली. आता पावसाळ्यात अतिक्रमण काढले जात आहे, याचा अर्थ त्यांनी खोटे सांगितले होते, हे स्पष्ट झाले आहे. 

आंदोलनकारकांवरील अन्यायकारक कारवाई

१४ जुलैला झालेला उद्रेक प्रशासनाच्या अन्यायकारक भूमिकेमुळेच झाला असल्याचे समितीने म्हटले आहे. आंदोलनकर्त्यांवर दरोड्यासारखी कलमे लावणे आणि निरपराध आंदोलनकर्त्यांना अटक करणे चुकीचे असून, या प्रकरणी सर्व आंदोलनकर्त्यांवरील गुन्हे तात्काळ मागे घेण्याची मागणी समितीने केली आहे. तसेच, अतिक्रमण हटवण्याची मोहिम विशाळगडावरील सर्व अतिक्रमणे हटवूनच पूर्ण करावी, अशीही मागणी समितीने केली आहे.

समितीचे सातत्यपूर्ण प्रयत्न

मार्च २०२१ पासून विशाळगडावरील अतिक्रमणाच्या विषयाला वाचा फोडून, आंदोलने, निवेदने, आणि विधानसभा अधिवेशन काळात हा विषय सातत्याने लावून धरत समितीने आपले प्रयत्न सुरु ठेवले आहेत. पुरातत्व खात्याचे दुर्लक्ष आणि गडावरील अतिक्रमणांच्या बाबतीत प्रशासनाची निष्क्रियता याकडे त्यांनी वारंवार लक्ष वेधले आहे.

प्रशासनाच्या ढिलाईमुळेच अतिक्रमणाचे प्रश्न 

विशाळगड रक्षण आणि अतिक्रमणविरोधी कृती समितीने शासनाने तत्कालीन जिल्हाधिकारी राहुल रेखावार यांच्यावर कारवाई करावी, अशी मागणी केली आहे. समितीच्या मते, प्रशासनाच्या ढिलाईमुळेच अतिक्रमणाचे प्रश्न निर्माण झाले असून, या प्रकरणात दोषींवर कठोर कारवाई करणे अत्यावश्यक आहे.