शस्त्राचा धाक दाखवून टेम्पोचालकाला लुटणारे तिघे अटकेत

 

पिंपरी : आकुर्डी, खंडोबामाळ येथे २१ मे रोजी पहाटे पाच वाजण्याच्या सुमारास पुण्याकडून तळेगावच्या दिशेने जाणारा एका पिक अप टेम्पोचालकाला  पिस्तूल आणि कोयत्याचा धाक दाखवून लुटण्यात आले होते. या प्रकरणाचा मोठ्या शिताफीने तपास करत निगडी पोलिसांनी तिघा दाखलेबाज गुन्हेगारांना बेड्या ठोकल्या असून त्यांच्याकडून १ लाख २५ हजार ४०० रुपयांचा मुद्देमाल जप्त केला आहे.

आकाश मनोज लोट (वय-२२ रा. मोशी), सनी उर्फ अशुतोष अशोक परदेशी उर्फ रोकडे (वय-२४ रा. पाटीलनगर, चिखली), अनिकेत गौतम शिंदे (वय-२४ रा. पाटीलनगर, चिखली) अशी अटक केलेल्यांची नावे आहेत.

या प्रकरणातील फिर्यादी २१ मे रोजी पहाटे त्याच्या मित्रासह हडपसर, पुणे येथून तळेगाव दाभाडे येथे जात होते. गाडीचे टायर गरम झाले आहेत असे वाटल्याने पहाटे पाचच्या सुमारास ते आकुर्डी, खंडोबामाळ परिसरात थांबले होते. त्यावेळी तेथे बुलेटवरून आरोपी आले. त्यांनी पिस्तूल आणि कोयत्याचा धाक दाखवून फिर्यादीकडील ७ हजार रुपये लुटून नेले.या प्रकरणी निगडी पोलीसठाण्यात गुन्हा दाखल करण्यात आला होता. त्याचा तपास करून निगडी पोलिसांनी आरोपींना अटक केली. त्यांच्याकडून 1 लोखंडी पिस्टल, 2 मोबाईल, 2 लोखंडी कोयते आणि गुन्ह्यात वापरलेली एक बुलेट असा मुद्देमाल जप्त केला.

ही कामगिरी पोलीस आयुक्त विनय कुमार चौबे, अपर आयुक्त वसंत परदेशी, उपायुक्त स्वप्ना गोरे, सहायक आयुक्त राजू मोरे यांच्या मार्गदर्शनाखाली वरिष्ठ निरीक्षक शत्रुघ्न माळी, निरीक्षक गुन्हे तेजस्वीनी कदम, सहायक निरीक्षक अंबरिष देशमुख, अंमलदार दत्ता शिंदे, सुधाकर आवताडे, राहुल गायकवाड, विनोद व्हनमाने, भुपेंद्र चौधरी, सिद्राम बाब, तुषार गेंगजे, प्रवीण बांबळे, विनायक मराठे, सुनिल पवार, केशव चेपटे,स्वप्नाली म्हसकर, सारीका अंकुश यांनी केली.