मीरा भाईंदर महापालिकेच्या कचरा डंपींग ग्राऊंडवरील कचऱ्याला वारंवार लागणाऱ्या आगीमुळे उत्तन आणि डोंगरीमधील नागरिक त्रस्त
भाईंदर : मीरा भाईंदर महापालिकेच्या भाईंदर पश्चिम येथील उत्तन डम्पिंग ग्राऊंडवर असलेल्या कचऱ्याला वारंवार लागणाऱ्या आगीमुळे उत्तन आणि डोंगरीमधील नागरिक त्रस्त झाले आहेत. गेल्या महिनाभरात येथील कचऱ्याला दुसऱ्यांदा आग लागली आहे. आग लागली की त्याचा धूर आणि दुर्गंधी यामुळे उत्तन आणि डोंगरी येथील रहिवाशांना आतोनात त्रास सहन करावा लागत आहे. या प्रकारामुळे येथील नागरिकांना श्वास घेण्यास त्रास होत आहे. डोळे चुरचुरत आहेत. लहान मुले आणि वृद्ध यांना गंभीर श्वसनाचे आजार जडण्याचा धोका निर्माण झाला आहे. हा प्रकार त्वरित थांबला नाही तर कचरा महापालिकेच्या मुख्यालयासमोर आणून टाकण्याचा इशारा नागरिकांनी दिला आहे.
वॉचडॉग फाउंडेशनचे गॊडफ़्रे पिमेंटा यांनी या प्रकरणी महापालिका आयुक्तांना ई मेल केला असून त्यात कचऱ्याला वारंवार लागणाऱ्या आगीच्या घटनांकडे त्यांचे लक्ष वेधले आहे.त्याचबरोबर केंद्रीय आणि राज्य प्रदूषण नियंत्रण मंडळाचे लक्षही या प्रकाराकडे वेधले आहे.
पिमेंटा यांनी मेलमध्ये म्हटले आहे की, भाईंदर पश्चिम येथील उत्तन डम्पिंग ग्राऊंडवर उद्भवलेल्या भीषण परिस्थितीकडे आम्ही तातडीने आपले लक्ष वेधण्यासाठी लिहित आहोत. आज आगीची आणखी एक चिंताजनक घटना घडली आहे, एका महिन्यातील दुसरी घटना, ज्याने शेजारील गावे सतत धुरात बुडाली आहेत.
या गावांतील रहिवाशांना या सततच्या समस्येचा त्रास सहन करावा लागत आहे, कचऱ्यातून उत्सर्जित होणाऱ्या विषारी दुर्गंधीचा सामना करावा लागत आहे आणि स्वच्छ हवेचा श्वास घेण्यासाठी संघर्ष करावा लागत आहे. कारवाईसाठी त्यांची सतत विनंती असूनही, परिस्थिती”जैसे थे’ आहे आणि समाजाचे आरोग्य ’ धोक्यात आले आहे. या वारंवार घडणाऱ्या घटना आणि त्यामुळे सार्वजनिक आरोग्य आणि पर्यावरणाला निर्माण होणारा धोका लक्षात घेता, आम्ही प्रदूषण नियंत्रण मंडळांना तातडीने हस्तक्षेप करण्याची विनंती करतो.
या आगीची मूळ कारणे शोधण्यासाठी आणि बाधित स्थानिक रहिवाशांची सुरक्षा आणि कल्याण सुनिश्चित करण्यासाठी सर्वसमावेशक उपाययोजना करणे अत्यावश्यक आहे. आम्ही तुम्हाला या प्रकरणाला प्राधान्य देण्याची आणि पुढील हानी टाळण्यासाठी निर्णायक कारवाई करण्याची विनंती करतो. आगीच्या घटना थांबल्या नाहीत, तर मीरा-भाईंदर महानगरपालिका मुख्य कार्यालयासमोर कचरा टाकण्यास स्थानिक रहिवाशांना भाग पडणार आहे.
![उत्तन आणि डोंगरीमधील नागरिकांनी मीरा भाईंदर महापालिकेसमोर कचरा टाकण्याचा दिला इशारा! (VIDEO)](https://blogger.googleusercontent.com/img/b/R29vZ2xl/AVvXsEjG_fv9DcCw-tO-Rn_UBXI-hKLyFQeabkjYY4YoNye-OZD_doPYX0GRbu6UqZkd2uqhGxCDkGtkX-A-1pENoHfvtnyqTcAXzEtHiWwvDbis4tuvCLap4cWwroSEE7r3oFd3RG9OeEDxQrmX10Ba6_41BcTpHvoiULAoI2EaHbcYk_OvVfqB9UuPuSJhkwc/s72-c/WhatsApp%20Image%202024-03-30%20at%2014.30.01.jpeg)
कोणत्याही टिप्पण्या नाहीत: