शिरुर भूमिअभिलेख कार्यालयातील मोजणीदारासह एकास लाच घेताना पकडले

 

पुणे : पुणे जिल्ह्यातील शिरूर येथील भूमी अभिलेख कार्यालयातील जमीन मोजणीदार आणि एक खासगी व्यक्तीला लाचलुचपत प्रतिबंधक खात्याच्या अधिकार्‍यांनी ६ मार्च रोजी पकडले आहे. मोजणीदाराने खासगी व्यक्ती करवी तीन हजार रुपयांची लाच स्वीकारली असल्याने ही कारवाई करण्यात आली. धामारी गावातील एस.टी. स्टँडसमोरील रस्त्यावर ही कारवाई करण्यात आली.

शिवराज यशवंत बंडगर, वय २४ वर्षे, पद- भूकरमापक, भूमी अभिलेख कार्यालय, ता. शिरुर, जि. पुणे  आणि अमोल विष्णु कदम, वय २७ वर्षे, रा. सरदवाडी, ता. शिरुर, जि. अशी ताब्यात घेण्यात आलेल्या दोघांची नावे आहेत. त्यांच्याविरोधात भ्रष्टाचार प्रतिबंध अधिनियम, सन १९८८ चे कलम ७ अ, १२ अन्वये शिक्रापूर पोलीसठाण्यात गुन्हा दाखल करण्यात आला आहे.

या प्रकरणी एका ४३ वर्षांच्या व्यक्तीने तक्रार दिली होती. तक्रारदाराची धामारी येथे शेतजमीन आहे. त्याची हद्दनिश्चिती करण्यासाठी त्याने रीतसर सरकारी फी भरून भूमी अभिलेख कार्यालयाकडे अर्ज केला होता. या प्रकरणातील आरोपी क्रमांक १ शिवराज बंडगर मोजणीसाठी ५ हजार रुपयांची लाच अमोल कदम याच्याकरवी मागितली होती. दोन्ही आरोपी धामारी येथे मोजणीसाठी आले असता अमोल कदम याने या कामासाठी ५ हजार रुपयांची लाच तक्रारदाराकडे मागितली. तडजोडीअंती ३ हजार रुपये स्वीकारले. त्यावेळी तेथे उपस्थित असलेल्या लाचलुचपत प्रतिबंधक खात्याच्या अधिकार्‍यांनी पंचांसमक्ष त्याला आणि शिवराज बंडगर याला ताब्यात घेतले.

या प्रकरणाचा तपास पुणे येथील लाचलुचपत प्रतिबंधक खात्याचे पोलीस निरीक्षक प्रवीण निंबाळकरकरीत आहेत.

ही कारवाई पोलीस अधीक्षक अमोल तांबे, अपर  अधीक्षक डॉ. शीतल जानवे, यांच्या मार्गदर्शनाखाली पुणे लाचलुचपत प्रतिबंधक विभागाने केली.