एकाच नगरपरिषदेतील तीन अधिका-यांना लाच घेताना पकडले!

राजगुरुनगर : पुणे जिल्ह्यातील राजगुरूनगर नगरपरिषदेतील तीन अधिका-यांना बुधवारी लाचलुचपत प्रतिबंधक विभागाने आठ हजार रुपये लाच घेताना रंगेहाथ पकडले, या मुळे राजगुरुनगरमध्ये प्रचंड खळबळ माजली आहे. एकाच वेळी एका कार्यालयातील तीन अधिका-यांना लाच घेताना पकडण्यात आल्याची ही घटना राज्यातील एकमेव असण्याची शक्यता आहे.

नगरपरिषदेचे मुख्याधिकारी, आरोग्य विभागाची अभियंता आणि लेखापाल या तिघांना एसीबीने लाच घेताना पकडले आहे. मुख्याधिकारी श्रीकांत अण्णासाहेब लाळगे  (वय 35), पाणीपुरवठा विभागाची अभियंता चारुबाला राजेंद्र हरडे  (वय 31), लेखापाल प्रवीण गणपत कापसे  (वय 35) अशी पकडण्यात आलेल्या अधिका-यांची नावे आहेत.

नगरपरिषदेतील  साहित्य पुरवठा करणा-या ठेकेदाराचे 80 हजार 730 रुपयांचे  बिल काढण्यासाठी चारुबाला हरडे यांनी लाचेची मागणी केली होती. ठेकेदाराने एसीबीकडे तक्रार दिली.एसीबीच्या पथकाने बुधवारी राजगुरुनगर नगरपरिषदेत सापळा रचून तक्रारदार यांच्याकडून लाचेची रक्कम स्वीकारताना हरडे यांना रंगेहाथ पकडले.