पुणे पोलिसांनी जप्त केलेल्या ४ कोटी ७५ लाखांच्या अंमली पदार्थांची होळी

 

पुणे : पुणे पोलिसांचे अंमली पदार्थ विरोधी पथक तसेच शहरातील विविध पोलीस ठाण्यांतील पथकांनी तब्बल ४ कोटी ७५ लाख ५३ हजार रुपयांचे अंमली पदार्थ जप्त केले होते. हे अंमली पदार्थ नष्ट करण्याचे आदेश देण्यात आल्यानंतर रांजणगाव औद्योगिक वसाहतीतील खासगी कंपनीच्या भट्टीत अंमली पदार्थ जाळून नष्ट करण्यात आले. 

अधिक माहितीनुसार, पुणे शहर आणि परिसरात अंमली पदार्थांची तस्करी वाढत असल्याचे निदर्शनास येते आहे. गेल्या काही दिवसांत केलेल्या कारवाईत तब्बल ५ कोटी रुपयांचे अंमली पदार्थ विविध पोलीस ठाण्यांमधून केलेल्या कारवाईत पुणे पोलिसांनी जप्त केले. हे अंमली पदार्थ नष्ट करण्याचे आदेश देण्यात आले होते. 

दरम्यान, जप्तीच्या आदेशानुसार पोलिसांनी ६७ लाख ७८ हजार रुपये किंमतीचा गांजा, एक कोटी ९७ लाख १७ हजार रुपयांचा एक किलो ११४ ग्रॅम मेफेड्रोन, दोन कोटी १३ लाख ९४ हजार रुपयांचे एक किलो ४२६ ग्रॅम कोकेन, १९ लाख ६६ हजार रुपये चरस, दोन लाख ८७ हजार रुपयांचा अफूच्या बोंडांचा चुरा, चार लाख नऊ हजार रुपयांचे हेराॅईन असा अमली पदार्थांचा साठा नष्ट केला.

पोलीस आयुक्त रितेश कुमार, सहपोलीस आयुक्त संदीप कर्णिक यांच्या मार्गदर्शनाखाली मुद्देमाल नाश समितीचे अध्यक्ष अतिरिक्त आयुक्त रामनाथ पोकळे, उपायुक्त अमोल झेंडे, रोहिदास पवार, रासायनिक विश्लेषक जि. भ. सदाकाळ, न्यायवैद्यकीय प्रयोगशाळेचे क्षेत्र अधिकारी प्र. अ. लेंडे, महाराष्ट्र प्रदुषण नियंत्रण मंडळाचे प्रमोद डोके, राज्य उत्पादन शुल्क विभागाचे विठ्ठल बोबडे, एस. के. कोल्हे, पोलीस निरीक्षक अश्विनी सातपुते, सुनील थोपटे आदींनी ही कारवाई केली.