ज्येष्ठ नृत्यगुरु पं.मनीषा साठे यांच्या ७० व्या वाढदिवसानिमित्त अमेरिकेत 'नृत्य संवाद' !

 

पुणे :ज्येष्ठ कथक नृत्यगुरु पं.मनीषा साठे यांच्या ७० व्या वाढदिवसानिमित्त 'शांभवीज् इंटरनॅशनल स्कुल ऑफ कथक' यांच्यातर्फे अमेरिकेत 'नृत्य संवाद' हा कार्यक्रम आयोजित करण्यात आला आहे ! मनीषा साठे आणि त्यांची  कन्या शांभवी दांडेकर या दोघींच्या कथक नृत्याचे सादरीकरण या कार्यक्रमात होणार आहे.२९ जुलै २०२३ रोजी ओशमान फॅमिली जेसीसी(कोशलँड थिएटर),पालो आल्टो,सेंट्रल अमेरिका येथे तेथील प्रमाणवेळेनुसार दुपारी साडेचार ते सायंकाळी ७ वाजेपर्यंत हा कार्यक्रम होणार आहे.तन्मय बिच्छू (तबला),आदित्य रानडे(हार्मोनियम आणि गायन),नम्रता महाबळ(गायन),वल्लरी आपटे(पढंत) हे या कार्यक्रमात साथसंगत करणार आहेत. 

कथक नृत्य क्षेत्रातील योगदानाबद्दल मनीषा साठे यांचा सत्कारही अमेरिकास्थित भारतीयांच्या वतीने करण्यात येणार आहे. या कार्यक्रमासाठी  पूर्वनोंदणी १४ जुलै पर्यंत करायची आहे.या कार्यक्रमातून  येणाऱ्या निधीतून मनीषा नृत्यालय शिष्यवृत्ती निधी उभारण्यात येणार असून भारतातील ग्रामीण भागातील कथक शिकू इच्छिणाऱ्यांसाठी मदतीचा हात दिला जाणार आहे.कार्यक्रमाच्या प्रवेशिकांसाठी tugoz.com/nrityasamvaad या लिंकवर नोंदणी करावी,असे आवाहन करण्यात आले आहे. 

  पं.मनीषा साठे:एक 'नृत्यार्पित जीवन  प्रवास 

मनीषा साठे यांनी कथक नृत्याचे शिक्षण लहान वयात पुण्यात पं. बाळासाहेब गोखले यांच्याकडे घेतले. पुढे त्यांनी पं. गोपीकृष्ण यांच्याकडे मुंबई येथे शिक्षण सुरू ठेवले. प्रदीर्घ कारकिर्दीत त्यांनी सवाई गंधर्व भीमसेन संगीत महोत्सव, खजुराहो नृत्य महोत्सव, शनिवारवाडा नृत्य महोत्सव, लखनौ नृत्य महोत्सव, गोहत्ती येथील कामाख्या महोत्सव, मुंबईमधील नेहरू सेंटर आणि टाटा थिएटर अशा भारताच्या विविध ठिकाणी कथक नृत्य सादर केले आहे. तसेच भारताबाहेर अमेरिका, चीन, बहरैन, स्वित्झर्लंड, स्वीडन, इ. देशांत त्यांनी कार्यक्रम केले आहेत. 

कथक नृत्यात आधुनिक संगीत आणि विश्व संगीताचा वापर हे त्यांचे वैशिष्ट्य आहे. त्यांनी जपानी संगीताबरोबरही कथक सादर केले आहे. जपानी संगीतकार आणि ताईको वादक यासुहितो ताकीमोतो यांच्याबरोबर त्यांनी गेल्या १५ वर्षांत अनेक फ्युजन मैफली सादर केल्या आहेत.मनीषा साठे यांनी सरकारनामा आणि वारसा लक्ष्मीचा यांसह अनेक चित्रपटांसाठी नृत्य दिग्दर्शन केले आहे. महाराष्ट्र राज्य पुरस्कार आणि अल्फा टी.व्ही. पुरस्कार सोहोळ्यात त्यांना सर्वोत्तम नृत्य दिग्दर्शकाचा पुरस्कार मिळाला आहे.साठे ह्या मनीषा नृत्यालय ट्रस्ट या नावाची कथक नृत्याचे शिक्षण देणारी संस्था चालवतात. त्यांच्या अनेक विद्यार्थिनींना भारत सरकारच्या सांस्कृतिक खात्याची शिष्यवृत्ती मिळाली आहे.