मोक्का गुन्ह्यात मागील पाच वर्षांपासून फरार असलेला मुख्य आरोपी आंध्रप्रदेशमधून जेरबंद

पुणे : पुणे शहरातील वारजे माळवाडी पोलीस ठाण्याच्या मोक्का कायद्यांतर्गत दाखल असलेल्या गंभीर गुन्ह्यात मागील पाच वर्षांपासून फरार असलेला पाहिजे असलेला आरोपी राजुराम लिचमणराम उर्फ लक्ष्मण गेहलोत याला पुणे शहर गुन्हे शाखेच्या युनिट तीनच्या पथकाने आंध्र प्रदेश राज्यातून शिताफीने अटक केली आहे. वारजे माळवाडी पोलीस ठाण्यात दाखल गुन्ह्यामध्ये खुनाचा प्रयत्न, आर्म्स कायदा आणि संघटित गुन्हेगारी नियंत्रण कायद्यान्वये (मोक्का) गुन्हे नोंदवण्यात आले होते. हा आरोपी गुन्हा दाखल झाल्यापासून गेल्या पाच वर्षांपासून पोलिसांना गुंगारा देऊन सतत लपून राहत होता.

फरारी आरोपीचा शोध घेण्यासाठी वरिष्ठ अधिकाऱ्यांकडून विशेष सूचना देण्यात आल्या होत्या. यादरम्यान गुन्हे शाखेच्या युनिट तीनकडील पोलीस अंमलदार अतुल साठे आणि आशिष राठोड यांना आरोपीबाबत अत्यंत महत्त्वाची गोपनीय बातमी मिळाली होती. हा आरोपी आंध्र प्रदेश राज्यातील पलनडू जिल्ह्यातील दचेपल्ली परिसरात लपून बसल्याची खात्रीशीर माहिती मिळाल्यानंतर, पोलीस निरीक्षक प्रशांत अन्नछत्रे यांच्या मार्गदर्शनाखाली पोलीस उपनिरीक्षक संतोष भांडवलकर, अतुल साठे, आशिष राठोड, पुरुषोत्तम गुन्ला आणि योगेश झेंडे यांचे विशेष पथक तातडीने आंध्र प्रदेशकडे रवाना करण्यात आले.

पथकातील अधिकारी आणि अंमलदारांनी आंध्र प्रदेशमधील नार्केटपल्ली अडक्की महामार्गावरील दचेपल्ली येथील बाबा रामदेव ढाबा आणि एचपी पंपाजवळ सापळा रचला. गोपनीय बातमीदाराने दिलेल्या वर्णनानुसार आरोपी राजुराम लिचमणराम उर्फ लक्ष्मण गेहलोत (वय २७, मूळ रा. डाऊ, ता. जायल, जि. नागोर, राज्य राजस्थान) याला जागेवरच शिताफीने ताब्यात घेऊन अटक करण्यात आली. या कारवाईनंतर त्याला पुण्यात आणून पुढील कायदेशीर कारवाईकरिता गुन्ह्याचे तपासी अधिकारी तथा कोथरुड विभागाच्या सहायक पोलीस आयुक्तांच्या ताब्यात सुपूर्द करण्यात आले आहे. ही यशस्वी कारवाई उच्च पोलीस अधिकाऱ्यांच्या मार्गदर्शनखाली गुन्हे शाखेच्या पथकाने पार पाडली आहे.

• Labels: Pune Police, Crime Branch Unit 3, MCOCA Case, Fugitive Arrest, Andhra Pradesh Raid, Varje Malwadi Police

• Search Description: Pune Police Crime Branch arrested a fugitive wanted in a MCOCA case for the last five years from Dachepalli, Andhra Pradesh.

• Hashtags: #PunePolice #CrimeBranch #MCOCACase #FugitiveArrest #AndhraPradesh #PuneNews #LawAndOrder