निगडीत 'हरित सेतू'वरून खासदार श्रीरंग बारणे आक्रमक; "नागरिकांची गैरसोय करणारा विकास नको

 

पिंपरी: पिंपरी-चिंचवड महापालिकेच्या वतीने निगडी प्राधिकरणातील अंतर्गत रस्त्यांवर हरित सेतूच्या नावाखाली राबवण्यात येणाऱ्या अवाजवी विकासकामांवरून स्थानिक नागरिकांचा रोष प्रचंड वाढला आहे. या पार्श्वभूमीवर मावळचे खासदार श्रीरंग बारणे यांनी प्रत्यक्ष घटनास्थळी भेट देऊन पाहणी केली आणि महापालिका प्रशासनाला चांगलेच खडे बोल सुनावले. "नागरिकांची गैरसोय करणारा विकास नको, प्रशासनाने स्थानिकांच्या भावनांचा विचार करावा. जर महापालिकेने आपला हेकटपणा आणि हट्ट सोडला नाही, तर नागरिक स्वतः रस्त्यावर उतरून हे रस्ते आणि फूटपाथ उखडून टाकतील," असा थेट आणि गंभीर इशारा खासदार बारणे यांनी दिला आहे.

निगडी प्राधिकरणातील अंतर्गत रस्त्यांवर महापालिकेकडून दोन्ही बाजूंनी गरजेपेक्षा मोठे फूटपाथ बांधण्यात येत आहेत. यामुळे मूळ रस्ते अत्यंत अरुंद झाले असून, संपूर्ण परिसरात दिवसेंदिवस वाहतूक कोंडीची समस्या गंभीर बनत चालली आहे. स्थानिक रहिवाशांनी या कामाला तीव्र विरोध दर्शवला होता. नागरिकांच्या तक्रारींची दखल घेत खासदार श्रीरंग बारणे यांनी निगडी प्राधिकरण परिसराला भेट दिली, तिथे उपस्थित रहिवाशांशी थेट संवाद साधला आणि त्यांच्या अडीअडचणी जाणून घेतल्या.

नियोजनशून्य कारभारामुळे करदात्यांच्या पैशांची उधळण

नागरिकांशी संवाद साधल्यानंतर प्रसारमाध्यमांशी बोलताना खासदार बारणे म्हणाले की, पिंपरी-चिंचवड शहरात 'स्मार्ट सिटी' उपक्रमांतर्गत आणि महापालिकेकडून सुरू असलेल्या रस्त्यांच्या व फूटपाथच्या कामांवरून जनतेमध्ये तीव्र असंतोष पसरला आहे. प्रशासनाच्या हेकट कारभारामुळे आणि नियोजनशून्य विकासकामामांमुळे सर्वसामान्य नागरिकांची मोठी गैरसोय होत आहे. प्राधिकरणाने पूर्वी दिलेल्या भूखंडांवर बांधण्यात आलेल्या जुन्या पक्क्या घरांमध्ये स्वतंत्र पार्किंग व्यवस्था नाही. त्यामुळे रहिवाशांना आपल्या गाड्या रस्त्याच्या कडेलाच पार्क कराव्या लागतात. अशा परिस्थितीत फूटपाथ अर्ध्या रस्त्यापर्यंत वाढवल्याने गाड्या कुठे उभ्या करायच्या आणि वाहतूक कशी सुरळीत ठेवायची, असा बिकट प्रश्न निर्माण झाला आहे.

स्मार्ट सिटी आणि सुशोभीकरणाच्या नावाखाली महापालिकेकडून कोट्यवधी रुपये खर्च केले जात आहेत. वाकडे-तिकडे डिझाईन्स करून रस्ते लहान केले जात आहेत. यापूर्वी सुशोभीकरणाच्या नावाखाली महापालिकेने लावलेली किती झाडे जगली आणि किती पैसा वाया गेला, याचे निष्पक्ष ऑडिट केले पाहिजे, अशी ठाम मागणीही त्यांनी केली.

प्रशासनाला अधिकृत पत्राद्वारे तीव्र विरोधाचा इशारा

महापालिका प्रशासनाने स्थानिक नागरिकांना कोणत्याही प्रकारे विश्वासात न घेता मनमानी कारभार सुरू ठेवला आहे. यासंदर्भात पिंपरी-चिंचवड महापालिका आयुक्त तसेच संबंधित विभागाचे प्रमुख बापू गायकवाड यांच्याकडे आधीच तक्रार नोंदवण्यात आली आहे. लोकांना सोयीस्कर ठरेल असा योग्य आणि मर्यादित आकाराचा फूटपाथ करण्यास कोणाचाही विरोध नाही. मात्र, विकासाच्या नावाखाली स्थानिक रहिवाशांना वेठीस धरणे अत्यंत चुकीचे आहे.

कोणताही विकास प्रकल्प राबवण्यापूर्वी स्थानिक नागरिकांशी चर्चा करून त्यांच्या गरजा समजून घेतल्या पाहिजेत. करदात्यांचा निधी अनावश्यक डिझाईन्स आणि दिखाऊ सुशोभीकरणावर उधळण्याऐवजी योग्य व उपयुक्त कामांसाठी वापरला गेला पाहिजे. नागरिकांची गैरसोय होणार नाही, अशाच पद्धतीने रस्ते व फूटपाथचे नियोजन करावे. या संपूर्ण प्रश्नाबाबत लवकरच महापालिका आयुक्तांना अधिकृत पत्र देऊन तीव्र विरोध दर्शवण्यात येणार असल्याचे खासदार श्रीरंग बारणे यांनी स्पष्ट केले.

• Labels: Pimpri Chinchwad, Nigdi News, Srirang Barne, PCMC News, Harit Setu, Traffic Congestion, Smart City Pune

• Search Description: MP Srirang Barne warns PCMC administration over Harit Setu project in Nigdi Pradhikaran, citing narrow roads and public inconvenience.

• Hashtags: #PimpriChinchwad #Nigdi #SrirangBarne #PCMC #SmartCity #PuneNews #PublicProtest