भारती विद्यापीठ परिसरात दोन अल्पवयीन मुलांकडून गावठी पिस्तूल जप्त

पुणे (विशेष प्रतिनिधी): गणेशोत्सवाच्या संवेदनशील काळात शहरात कोणत्याही प्रकारची अनुचित घटना घडू नये यासाठी पुणे पोलिसांनी सुरू केलेल्या विशेष गस्त मोहिमेदरम्यान भारती विद्यापीठ पोलिसांनी मोठी कारवाई केली आहे. लेकटाऊन रोडवरील शंकरराव राजाराम कदम स्विमिंग पुलासमोर बेकायदेशीररीत्या गावठी कट्टा बाळगून थांबलेल्या दोन अल्पवयीन बालकांना पोलिसांनी ताब्यात घेतले आहे त्यांच्याकडून ५० हजार रुपये किंमतीचा गावठी बनावटीचा कट्टा जप्त करण्यात आला आहे.

१८ सप्टेंबर २०२६ रोजी रात्री ७.५३ वाजेच्या सुमारास भारती विद्यापीठ पोलीस ठाण्याचे वरिष्ठ पोलीस निरीक्षक सुदर्शन गायकवाड यांच्या मार्गदर्शनाखाली पोलीस उपनिरीक्षक अण्णा दराडे, पोलीस अंमलदार सागर बोरगे, मितेश चोरमोले, अभिनय चौधरी आणि सोहम शेंडकर यांचे पथक परिसरात पेट्रोलिंग करत होते.

गोपनीय बातमीदाराच्या माहितीवरून सापळा

पेट्रोलिंग दरम्यान उपनिरीक्षक अण्णा दराडे यांना गोपनीय बातमीदाराकडून माहिती मिळाली की, दोन अल्पवयीन मुले लेकटाऊन रोडवरील स्विमिंग पुलाच्या समोरील बाजूस रस्त्यालगत संशयास्पदरीत्या थांबली असून त्यांच्याकडे घातक अग्निशस्त्र आहे. माहिती मिळताच पथकाने क्षणाचाही विलंब न लावता घटनास्थळी धाव घेऊन दोन्ही विधीसंघर्षग्रस्त बालकांना ताब्यात घेतले.

त्यांची अंगझडती घेतली असता त्यांच्याकडे ५० हजार रुपये किंमतीचा एक गावठी बनावटीचा कट्टा मिळून आला पोलिसांनी लागलीच कट्टा जप्त केला असून, या प्रकरणी भारती विद्यापीठ पोलीस ठाण्यात सरकारतर्फे भारतीय हत्यार अधिनियम कलम ३ सह २५ व महाराष्ट्र पोलीस अधिनियम कलम ३७(१)(३) सह १३५ अन्वये गुन्हा नोंदवण्यात आला आहे.

वरिष्ठ अधिकाऱ्यांच्या मार्गदर्शनाखाली कारवाई

गणेशोत्सव काळात शहरभर कडक बंदोबस्त तैनात असताना अल्पवयीन मुलांच्या हाती अग्निशस्त्रे आढळल्याने खळबळ उडाली असून हे शस्त्र त्यांनी कुठून व कशासाठी आणले होते, याचा सखोल तपास पोलीस करत आहेत.

सदर कारवाई  उपआयुक्त (परिमंडळ २) मिलिंद मोहिते, सहाय्यक आयुक्त राहुल आवारे यांच्या मार्गदर्शनाखाली वरिष्ठ निरीक्षक सुदर्शन गायकवाड, निरीक्षक (गुन्हे) संतोष जाधव, उपनिरीक्षक अण्णा दराडे, अंमलदार सागर बोरगे, मितेश चोरमोले, अभिनय चौधरी, सोहम शेंडकर, सचिन सरपाले, निलेश खैरमोडे, किरण साबळे, मंगेश गायकवाड, मंगेश पवार, तुकाराम सुतार आणि संदीप आगळे यांच्या पथकाने केली.

• Labels: Pune News, Bharti Vidyapeeth Police, Illegal Firearm Seized, Gavthi Katta Pune, Ganeshotsav Security

• Search Description: Bharti Vidyapeeth Police Pune seize country-made pistol worth Rs 50000 from two juvenile conflict boys near Katraj Lake Town.

• Hashtags: #PunePolice #IllegalWeapon #BhartiVidyapeeth #Ganeshotsav2026 #PuneCrimeNews