ज्येष्ठ अभिनेत्री रोहिणी हट्टंगडी यांना अमेरिकेत मानाचा 'नाफा जीवन गौरव' प्रदान; आई-वडील आणि गुरूंना सन्मान समर्पित

सॅन होजे (कॅलिफोर्निया, अमेरिका): महाराष्ट्र शासनाच्या अधिकृत सहकार्याने आयोजित करण्यात आलेल्या तिसऱ्या 'नाफा' (NAFA - North American Film Award) मराठी चित्रपट महोत्सव २०२६ चा भव्य आणि दिमाखदार प्रारंभ अमेरिकेतील कॅलिफोर्निया राज्यातील सॅन होजे शहरात झाला. हॉलिवूडच्या ग्लॅमरला साजेसा रेड कार्पेट सोहळा, कॅमेऱ्यांचा लखलखता फ्लॅश आणि मराठी चित्रपटसृष्टीतील अष्टपैलू तारे-तारकांच्या आगमनाने सॅन होजे परिसरातील वातावरण मराठमोळ्या उत्साहाने भारून गेले. या आंतरराष्ट्रीय महोत्सवाच्या उद्घाटन सोहळ्यात हिंदी-मराठी चित्रपटसृष्टी आणि नाट्यसृष्टीतील ज्येष्ठ अभिनेत्री रोहिणी हट्टंगडी यांना त्यांच्या प्रदीर्घ व समृद्ध कलाप्रवासाबद्दल मानाचा 'नाफा जीवन गौरव' पुरस्कार देऊन सन्मानित करण्यात आले.

परदेशातील पहिला जीवन गौरव पुरस्कार

कॅलिफोर्नियातील सॅन होजे येथील ऐतिहासिक 'कॅलिफोर्निया थिएटर' येथे आयोजित करण्यात आलेल्या या तीन दिवसीय महोत्सवाच्या पहिल्याच दिवशी रोहिणी हट्टंगडी यांना जीवन गौरव पुरस्काराने गौरवण्यात आले. नाफाचे संस्थापक-अध्यक्ष अभिजित घोलप यांच्या हस्ते हा मानाचा पुरस्कार प्रदान करण्यात आला. या सोहळ्याला नाफाच्या को-कन्व्हेनर अर्चना सराफ, रिया ठोसर, ज्येष्ठ सभासद ठाणेदार यांच्यासह अनेक मान्यवर उपस्थित होते.

पुरस्कार स्वीकारल्यानंतर अत्यंत भावनिक झालेल्या रोहिणी हट्टंगडी यांनी आपल्या भावना व्यक्त केल्या. त्या म्हणाल्या, "हा सन्मान म्हणजे माझ्या संपूर्ण कलाप्रवासाला आकार देणाऱ्या माझ्या आई-वडिलांचे, माझे गुरू इब्राहिम अल्काझी, पती जयदेव हट्टंगडी, माझे सहकलाकार, दिग्दर्शक, लेखक आणि तंत्रज्ञ यांच्या कष्ट व मार्गदर्शनाचे फलित आहे. हा पुरस्कार मी या सर्वांना समर्पित करते. 'जीवन गौरव' मिळाला म्हणून घरी बसण्याचा माझा अजिबात विचार नाही, मला अजून खूप काम करायचे आहे. भारताबाहेर आंतरराष्ट्रीय व्यासपीठावर मिळालेला हा माझा पहिलाच जीवन गौरव पुरस्कार असल्याने हा क्षण माझ्यासाठी अत्यंत विशेष आणि भावनिक आहे."

नाफा म्हणजे केवळ चित्रपट महोत्सव नव्हे, तर सांस्कृतिक जागर

नाफाचे संस्थापक-अध्यक्ष अभिजित घोलप यांनी महोत्सवाच्या भूमिकेविषयी बोलताना सांगितले की, "नाफा हा केवळ रुपेरी पडद्याशी जोडलेला चित्रपट महोत्सव नसून अमेरिकेच्या भूमीत मराठी भाषा, कला, संस्कृती आणि परंपरेचे जतन करणारा एक मोठा सांस्कृतिक उत्सव आहे. महाराष्ट्र शासनाच्या सहकार्यामुळे या उपक्रमाला आंतरराष्ट्रीय पातळीवर मोठे अधिष्ठान प्राप्त झाले आहे. यापूर्वी हा जीवन गौरव पुरस्कार अभिनेते दिलीप प्रभावळकर आणि अभिनेते-दिग्दर्शक अमोल पालेकर यांना प्रदान करण्यात आला होता. आज त्याच प्रभावळीतील रोहिणी हट्टंगडी यांचा सन्मान करण्याची संधी मिळणे हा नाफाच्या संपूर्ण टीमसाठी अभिमानाचा क्षण आहे."

रेड कार्पेटवर मराठी सेलिब्रिटींचा 'स्वॅग'

रेड कार्पेटवर यंदा मराठी कलाकारांचा 'स्वॅग' काही औरच पाहायला मिळाला. पारंपरिक महाराष्ट्रीयन वेशभूषेपासून आधुनिक भारतीय आणि वेस्टर्न फॅशनपर्यंत विविध शैलींचे अनोखे मिश्रण कलाकारांच्या पेहरावातून दिसून आले. प्रत्येक कलाकाराने आपल्या व्यक्तिमत्त्वाला साजेशा शैलीत रेड कार्पेटवर एन्ट्री घेत उपस्थितांचे लक्ष वेधून घेतले.

गिरीजा ओक, श्रुती मराठे, अर्चना जोगळेकर, सई देवधर, गौरी घोलप यांच्या एलिगेंट आणि स्टायलिश ग्लॅमरस पेहरावाने सर्वांचे लक्ष वेधून घेतले. त्यांच्या आत्मविश्वासपूर्ण अंदाजाने अमेरिकेतील मराठी रसिकांमध्ये विशेष चर्चा रंगली. महेश कोठारे, अभिजित घोलप आणि अजिंक्य देव यांनी आपल्या व्यक्तिमत्त्वाला साजेशा आकर्षक पाश्चात्य वेशभूषेतून खास 'स्टार अपील' निर्माण केले.

तसेच तृप्ती भोईर, निर्माती मंजिरी ओक, नीलिमा कोठारे, अर्चना सराफ, रिया ठोसर, मानसी देवळेकर यांनी आपल्या व्यक्तिमत्त्वाला साजेशा देखण्या अंदाजात हजेरी लावली, तर दिग्दर्शक नागराज मंजुळे, अभिनेते अतुल कुलकर्णी, प्रसाद ओक यांच्या सहज आणि स्वाभाविक स्टाइलने उपस्थितांचे लक्ष वेधून घेतले. निर्माती गार्गी कुलकर्णी यांच्या आकर्षक लुकने रेड कार्पेटची शोभा वाढवली. परंपरा, आधुनिकता, भारतीयत्व आणि ग्लोबल फॅशन यांचा सुरेख संगम घडवत मराठी कलाकारांनी महाराष्ट्राच्या सांस्कृतिक वैविध्याची खास झलक हॉलिवूडनगरीत दाखवून दिली.

तीन दिवस रंगणार चित्रपट, लघुपट आणि चर्चासत्रे

नाफाच्या प्रथेनुसार आदल्यादिवशी नाफा संस्थापक अध्यक्ष अभिजित घोलप यांच्या घरी 'गाला डिनर'चे आयोजन करण्यात आले होते. या डिनरमध्ये मराठी कलावंतांसह अमेरिकेतील प्रतिष्ठित मान्यवरांची उपस्थिती लाभली. सॅन होजे येथील कॅलिफोर्निया थिएटरमध्ये तीन दिवस रंगणाऱ्या या महोत्सवात विविध चर्चासत्रे, मार्गदर्शनपर व मनोरंजक कार्यक्रमांसह अनेक चित्रपट आणि लघुपटांचे जागतिक प्रथम प्रदर्शन (World Premiere) व विशेष स्क्रीनिंग होणार आहे. हॉलिवूडच्या पंढरीत मराठी सिनेमाचा झेंडा आणि मराठी संस्कृतीचा जागर घडविणारा 'नाफा फिल्म फेस्टिव्हल २०२६' चा हा दिमाखदार सोहळा जागतिक मराठी समुदायासाठी अभिमानाचा ठरत आहे.

Labels:

NAFA Film Festival 2026, Rohini Hattangadi, San Jose California, Abhijit Gholap, Marathi Cinema, Hollywood San Jose, Maharashtra Government

Search Description:

Veteran actress Rohini Hattangadi honored with NAFA Lifetime Achievement Award 2026 in San Jose, California in the presence of top Marathi film stars.

Hashtags:

#NAFA2026 #RohiniHattangadi #MarathiCinema #SanJose #California #Hollywood #MarathiCulture #NAFAFilmFestival