मुंबई उच्च न्यायालयाचा मोठा दणका: अमली पदार्थ तस्करीतील आरोपीचा जामीन फेटाळला

मुंबई : मुंबई उच्च न्यायालयाने अमली पदार्थ तस्करीतील एका सराईत आरोपीचा जामीन अर्ज फेटाळून लावत गंभीर टिप्पणी केली आहे. वारंवार जामिनावर सुटून त्याच स्वरूपाचे गुन्हे करणे आणि न्यायालयाच्या अटी व शर्तींचे उल्लंघन करणे, या कारणास्तव आसिफ कासम राजकोटवाला याच्या जामीन अर्जावर सुनावणी करताना न्यायालयाने हा निर्णय दिला.

नेमके प्रकरण काय? अंमली पदार्थ विरोधी कक्ष, गुन्हे शाखा, मुंबई यांनी दिलेल्या माहितीनुसार, १३ एप्रिल २०२५ रोजी वाडीबंदर येथील एस.व्ही.पी. रोडवर पोलिसांनी कारवाई केली होती. या कारवाईत इब्राहिम कासम चौहान याला ७५ ग्रॅम एम.डी. (मेफेड्रॉन) सह अटक करण्यात आली होती. तपासादरम्यान, हे अमली पदार्थ आसिफ कासम राजकोटवाला याने पुरवल्याचे निष्पन्न झाले. गुन्हा घडल्यापासून आरोपी आसिफ राजकोटवाला फरार होता. अखेर, अमली पदार्थ विरोधी कक्ष, घाटकोपर युनिटने सुरत गुन्हे शाखेच्या मदतीने त्याला सुरत येथे अटक केली. मुंबईत आणल्यानंतर त्याच्या राहत्या घरातून आणखी २२ ग्रॅम एम.डी. जप्त करण्यात आले.

आरोपीची गुन्हेगारी पार्श्वभूमी अटक आरोपी आसिफ राजकोटवाला याच्यावर यापूर्वीच अंमली पदार्थ तस्करीशी संबंधित गंभीर गुन्हे दाखल आहेत. यामध्ये नार्कोटिक्स कंट्रोल ब्युरो (NCB) कडील गुरनं ११/२०२१ आणि अंमली पदार्थ विरोधी कक्ष, वांद्रे युनिटकडील गुरनं २१/२०२३ या गुन्ह्यांचा समावेश आहे. या सर्व प्रकरणांमध्ये एन.डी.पी.एस. कायदा १९८५ च्या कलमान्वये कारवाई करण्यात आली आहे.

न्यायालयाचे निरीक्षण आरोपीने यापूर्वी सत्र न्यायालयात केलेला जामीन अर्ज फेटाळण्यात आला होता, त्यानंतर त्याने उच्च न्यायालयात धाव घेतली होती. मात्र, आरोपीच्या गुन्हेगारी प्रवृत्तीची दखल घेत न्यायालयाने म्हटले की, "आरोपी वारंवार जामिनावर सुटून त्याच स्वरूपाचे गुन्हे करत आहे आणि न्यायालयाच्या अटींचे सर्रास उल्लंघन करत आहे". या निरीक्षणानंतर न्यायालयाने त्याचा जामीन अर्ज नामंजूर केला.

यशस्वी कारवाई ही धडक कारवाई पोलीस आयुक्त देवेन भारती, सह आयुक्त (गुन्हे) अनिल कुंभारे आणि अपर आयुक्त (गुन्हे) कृष्णकांत उपाध्याय यांच्या मार्गदर्शनाखाली करण्यात आली. उप आयुक्त (अं.प.वि.) पोर्णिमा चौगुले-श्रींगी आणि सहाय्यक आयुक्त सुधीर हिरडेकर यांच्या देखरेखीखाली, घाटकोपर युनिटचे वरिष्ठ निरीक्षक श्रीकांत आदाटे यांच्या नेतृत्वात निरीक्षक दिगंबर पाटील यांनी ही कामगिरी पार पाडली. सरकारी पक्षातर्फे सहायक सरकारी अभियोक्ता मयुर सोनवणे यांनी उच्च न्यायालयात बाजू मांडली.

Labels: Mumbai Crime News, Narcotics Control, High Court Decision, NDPS Act, Drug Trafficking, Mumbai Police

Search Description: Mumbai High Court rejects the bail plea of a repeat offender in a drug trafficking case involving 97 grams of MD. The accused, Asif Kasam Rajkotwala, has a history of previous NDPS cases.

Hashtags: #MumbaiPolice #CrimeBranch #NDPS #AntiNarcotics #HighCourt #Justice #MDSeizure