कबीर कांबळे यांच्या हस्ते गुणवंत विद्यार्थ्यांचा गौरव; अमित गोरखे यूथ फाउंडेशनच्या वतीने गुणवंत विद्यार्थी सत्कार सोहळा

पिंपरी-चिंचवड : महाराष्ट्र राज्याचे मुख्यमंत्री देवेंद्र फडणवीस यांच्या वाढदिवसाचे औचित्य साधून आणि गणपत गोरखे यांच्या स्मृतिप्रीत्यर्थ 'अमित गोरखे यूथ फाउंडेशन'च्या वतीने 'गुणवंत विद्यार्थी सत्कार सोहळा २०२६' नोवेल स्कूल येथे उत्साहात पार पडला. या सोहळ्यात इयत्ता दहावी आणि बारावीच्या परीक्षेत उत्कृष्ट यश मिळवलेल्या विद्यार्थ्यांचा विशेष सत्कार करण्यात आला. गुणवंत विद्यार्थ्यांच्या पुढील शिक्षणाला आर्थिक पाठबळ देण्यासाठी या प्रसंगी 'गणपत गोरखे शिष्यवृत्ती'चे वितरण करण्यात आले. उपक्रमाचे हे सलग सातवे वर्ष होते. या सोहळ्यात महाराष्ट्राचे माजी उपमुख्यमंत्री अजित पवार यांना जयंतीनिमित्त आदरपूर्वक अभिवादन करण्यात आले.

या कार्यक्रमाला पिंपरी-चिंचवड महानगरपालिकेचे अतिरिक्त आयुक्त विक्रांत बागडे आणि केंद्रीय लोकसेवा आयोगाच्या (UPSC) परीक्षेत देशात १२५ वा क्रमांक पटकावणारे शहराचे सुपुत्र कबीर कांबळे प्रमुख पाहुणे म्हणून उपस्थित होते. व्यासपीठावर विधानपरिषद आमदार अमित गोरखे, उपमहापौर शर्मिला बाबर, नगरसेवक तुषार हिंगे,अनुराधा गोरखे, सुप्रिया चांदगुडे, कुशाग्र कदम आणि नेताजी शिंदे यांच्यासह अनेक लोकप्रतिनिधी, पदाधिकारी, विद्यार्थी व पालक मोठ्या संख्येने उपस्थित होते.

कठीण परिस्थितीवर मात करत यश संपादन करणाऱ्या कबीर कांबळे यांनी आपल्या प्रेरणादायी प्रवासाबद्दल विद्यार्थ्यांना मार्गदर्शन केले. "मागासवर्गीय समाजातून पुढे येत मी UPSC परीक्षेची तयारी केली. पदवीनंतरच्या सुरुवातीच्या प्रयत्नांत मला सलग अपयश आले, परंतु कुटुंबाने खंबीर पाठिंबा दिला. मोबाईलपासून दूर राहून, कोणत्याही खाजगी कोचिंग क्लासशिवाय दररोज १२ तास सातत्यपूर्ण अभ्यास हेच माझ्या यशाचे रहस्य आहे. विद्यार्थ्यांनी अपयशाला न घाबरता अभ्यासात सातत्य ठेवावे आणि सोशल मीडियाचा वापर केवळ गरजेपुरता करावा," असा सल्ला कांबळे यांनी दिला. यापूर्वी आपणही असाच गुणगौरव पुरस्कार स्वीकारला होता आणि आज विद्यार्थ्यांचा गौरव करताना आनंद होत असल्याचे त्यांनी नमूद केले.

कार्यक्रमात बोलताना आमदार अमित गोरखे यांनी सांगितले की, राजकारण म्हणजे केवळ स्वागत स्वीकारणे नसून ती एक सामाजिक कसोटी आहे. विद्यार्थ्यांनी आयुष्यात योग्य आदर्शांची निवड केल्यास यश निश्चित मिळते. पिंपरी-चिंचवड महानगरपालिकेचे अतिरिक्त आयुक्त विक्रांत बागडे यांनी पालकांच्या भूमिकेवर प्रकाश टाकताना स्पष्ट केले की, पालकांनी आपल्या पाल्यांना अपयशाचे आणि आवडीच्या क्षेत्राच्या निवडीचे स्वातंत्र्य दिले पाहिजे. मुलांशी मोकळा संवाद ठेवणे गरजेचे आहे. एखादा रस्ता खराब झाला तर तो पुन्हा बांधता येतो, परंतु मुलांचे शिक्षण चुकले तर पूर्ण पिढी वाया जाते, त्यामुळे पालकांनी नवी पिढी घडवण्यासाठी योग्य मार्गदर्शन करावे.

गुणवंत विद्यार्थ्यांना मानचिन्ह आणि शिष्यवृत्ती देऊन मान्यवरांच्या हस्ते गौरविण्यात आले. शैक्षणिक क्षेत्रातील या उपक्रमामुळे विद्यार्थ्यांमध्ये नवा उत्साह निर्माण झाला आहे.

Labels:

Amol Gorkhe Youth Foundation, Kabir Kamble UPSC, Pimpri Chinchwad News, Student Felicitation 2026, Education News Maharashtra

Search Description:

UPSC topper Kabir Kamble felicitated meritorious students at the Amit Gorkhe Youth Foundation event in Pimpri Chinchwad, sharing his key tips for success.

Hashtags:

#PimpriChinchwad #UPSC #KabirKamble #AmitGorkhe #EducationNews #StudentFelicitation #MaharashtraNews