"एका झुरळाने हुकूमशहाला झुकवले!" – शिक्षणमंत्र्यांच्या राजीनाम्यानंतर उद्धव ठाकरे आणि राज ठाकरेंचा घणाघात

विशेष प्रतिनिधी | मुंबई | २५ जुलै २०२६ : देशभरातील विद्यार्थ्यांचा वाढता आक्रोश, ठिकठिकाणी झालेले तीव्र विरोध प्रदर्शन आणि राजकीय दबावाच्या पार्श्वभूमीवर केंद्रीय शिक्षणमंत्री धर्मेंद्र प्रधान यांनी अखेर आपल्या पदाचा राजीनामा दिला आहे. सोशल मीडियावरून त्यांनी आपल्या राजीनाम्याचे पत्र जाहीर केले. कॉकरोच जनता पार्टीचे अध्यक्ष अभिजीत दीपके यांनी पेटवलेल्या या आंदोलनाला आणि देशातील लाखो तरुणांच्या लढ्याला या राजीनाम्यामुळे मोठे यश आले आहे.

दरम्यान, शिक्षणमंत्र्यांच्या राजीनाम्यानंतर रविवारी मुंबईत होणाऱ्या आंदोलनाची दिशा काय असेल, याविषयी शिवसेना (उद्धव बाळासाहेब ठाकरे) प्रमुख उद्धव ठाकरे आणि महाराष्ट्र नवनिर्माण सेनेचे अध्यक्ष राज ठाकरे यांनी संयुक्त पत्रकार परिषद घेऊन आपली भूमिका स्पष्ट केली. हे आंदोलन मागे न घेता, युवाशक्तीचा विजयोत्सव साजरा करण्यासाठी आणि उर्वरित मागण्यांसाठी रविवारी दादर येथील शिवाजी पार्कवर एकत्र येण्याचे आवाहन दोन्ही नेत्यांनी केले आहे.

"एका झुरळाने हुकूमशाहाला झुकवले" – उद्धव ठाकरे

पत्रकार परिषदेत बोलताना उद्धव ठाकरे यांनी देशातील तरुणांचे आणि त्यांच्या पाठीशी खंबीरपणे उभ्या राहणाऱ्या पालकांचे विशेष अभिनंदन केले. "हा विषय केवळ एका राजीनाम्यापुरता मर्यादित नव्हता; या तरुणांनी देशाला भयाच्या छायेतून बाहेर काढले आहे. गेली १२ वर्षे देशातील जनतेवर सतत दबाव टाकला जात होता. जनता म्हणजे जणू काही माणसेच नाहीत, ती केवळ झुरळे आहेत अशा मग्रुरीने सत्ताधारी वागत होते. परंतु, 'यशवंत' चित्रपटातील संवादाप्रमाणे आज एका 'झुरळाने' हुकूमशाहाला झुकवून दाखवले आहे," असा घणाघाती हल्ला उद्धव ठाकरे यांनी चढवला.

तसेच, "ज्यांनी तरुणांना झुरळ म्हटले त्यांनी लक्षात ठेवावे की, खुर्चीत बसलात म्हणून डोक्यात माज आणू नका. देशामधील युवाशक्ती एकत्र आली तर काय करू शकते, याची ही छोटीशी झलक आहे," असा इशाराही त्यांनी दिला.

अमित शाह यांनी पोलिसांच्या अत्याचाराचे उत्तर द्यावे

दिल्लीत आणि देशाच्या इतर भागांत आंदोलक विद्यार्थ्यांवर झालेल्या लाठीमाराचा मुद्दा उपस्थित करत उद्धव ठाकरे म्हणाले की, "या आंदोलनादरम्यान भाजप सरकारचा अत्यंत बीभत्स आणि गुन्हेगारी चेहरा समोर आला आहे. युवतींवर हात उचलला गेला, त्यांचे कपडे फाडले गेले. साध्या वेषातील गुंड घुसवून तरुणांना बडवण्यात आले. खिळे लावलेले दंडुके आणि टीझर गनचा वापर करण्यात आला. या पोलिसांवर आणि त्यांना आदेश देणाऱ्यांवर गुन्हे दाखल होणार की नाही? हा अत्याचार करणाऱ्यांवर कारवाई झाली नाही, तर तरुणांचा मोर्चा आता धर्मेंद्र प्रधानांकडून गृहमंत्री अमित शाह यांच्याकडे वळल्याशिवाय राहणार नाही."

हा तरुणाईचा मोठा विजय; शिवाजी पार्कवर जल्लोष होणार – राज ठाकरे

महाराष्ट्र नवनिर्माण सेनेचे अध्यक्ष राज ठाकरे यांनी या घटनेला तरुणाईचा ऐतिहासिक विजय म्हटले. "एका वाक्यात सांगायचे तर जेन झी ने, मस्तवाल सरकारच्या झिंंज्या उपटून त्यांना जमिनीवर आणण्याचे काम या विद्यार्थ्यांनी केले आहे. अभिजीत दीपके आणि या सर्व तरुणांचा यात खूप मोठा वाटा आहे. सरकार कितीही मग्रूर असले तरी त्यांना माघार घ्यावी लागली," असे राज ठाकरे म्हणाले.

उद्याच्या कार्यक्रमाविषयी बोलताना राज ठाकरे म्हणाले, "उद्या शिवाजी पार्क मैदानावर वीर सावरकर मार्गावर व्यासपीठ असेल. तिथेच सर्व लोक जमतील. हा तरुणांच्या लढ्याचा विजय आहे आणि त्याचा जल्लोष झालाच पाहिजे. अभिजीत दीपके आणि त्याचे सहकारी यापुढील आंदोलनाची जी दिशा ठरवतील, त्याला आमचा पूर्ण पाठिंबा असेल."

इतर मागण्या आणि पोलीस कारवाईवर प्रश्न

शिक्षणमंत्र्यांनी राजीनामा दिला असला तरी आंदोलकांच्या उर्वरित दोन मागण्या अजून बाकी आहेत. विद्यार्थ्यांवर दाखल केलेले गुन्हे मागे घेणे आणि हिंसाचार करणाऱ्या पोलिसांवर कारवाई करणे यावर अद्याप केंद्र सरकारने स्पष्टता दिलेली नाही.

पत्रकार परिषदेदरम्यान इन्स्टाग्रामवर विद्यार्थ्यांनी विचारलेल्या प्रश्नांचा उल्लेख करत, "पाण्याचे फवारे आणि खिळे असलेल्या लाठ्या का वापरल्या? टीझर आणि इलेक्ट्रिक दंडुक्यांचा वापर कोणाच्या आदेशावरून झाला? नावाच्या पट्या न लावता मारहाण करणारे पोलीस अधिकारी कोण होते?" या सर्व प्रश्नांची उत्तरे गृहमंत्र्यांनी दिली पाहिजेत, अशी मागणी करण्यात आली.

महाराष्ट्र पोलिसांचे कौतुक करताना उद्धव ठाकरे म्हणाले की, "मुंबई आणि महाराष्ट्र पोलिसांनी अत्यंत संयमाने आणि उत्तम प्रकारे परिस्थिती हाताळली आहे. दिल्लीसारखा प्रकार महाराष्ट्रात घडला नाही, त्याबद्दल मी पोलीस दलाचे अभिनंदन करतो."

• Labels: Dharmendra Pradhan, Resignation, Education Minister, Uddhav Thackeray, Raj Thackeray, Abhijit Dipke, Student Protest, Mumbai News, Indian Politics, Breaking News

• Search Description: Union Education Minister Dharmendra Pradhan resigns following nationwide student protests. Uddhav Thackeray and Raj Thackeray address a press conference, calling it a victory of youth power.

• Hashtags: #DharmendraPradhan #Resignation #StudentProtest #UddhavThackeray #RajThackeray #YouthPower #BreakingNews #Mumbai