पिंपरी, १७ जून (प्रतिनिधी): महाराष्ट्राचे आराध्य आणि वारकरी संप्रदायाचे मुख्य श्रद्धास्थान असलेल्या श्री क्षेत्र देहू आणि श्री क्षेत्र आळंदी या पवित्र परिसराला 'संतभूमी' म्हणून अधिकृत व कायदेशीर दर्जा घोषित करावा, अशी आग्रही मागणी चिंचवड विधानसभा मतदारसंघाचे भारतीय जनता पक्षाचे आमदार शंकर जगताप यांनी आज मुख्यमंत्री देवेंद्र फडणवीस यांच्याकडे केली आहे. उत्तराखंड राज्याने ज्याप्रमाणे आपल्या क्षेत्राचा 'देवभूमी' म्हणून गौरव केला आहे, त्याच धर्तीवर महाराष्ट्रातील या अत्यंत पवित्र १६ किलोमीटरच्या परिसराचे जतन आणि गौरव करण्यासाठी हा निर्णय घेणे काळाची गरज असल्याचे आमदार जगताप यांनी मुख्यमंत्र्यांना पाठविलेल्या पत्रात म्हटले आहे.
संत ज्ञानेश्वर माउलींची संजीवन समाधी असलेल्या आळंदी ते जगद्गुरु संत तुकाराम महाराजांचे वास्तव्य आणि वैकुंठगमन झालेल्या देहू या दोन्ही धार्मिक क्षेत्रांमधील परिसर वारकरी परंपरा, अध्यात्म आणि संत साहित्याने वर्षानुवर्षे समृद्ध आहे. दरवर्षी आषाढी-कार्तिकी वारीच्या निमित्ताने तसेच वर्षभर लाखो भाविक या ठिकाणी अत्यंत श्रद्धेने नतमस्तक होतात. या पार्श्वभूमीवर, स्थानिक नागरिक आणि संपूर्ण वारकरी समाजातून या पंचक्रोशीला 'संतभूमी'चा दर्जा देण्याची मागणी सातत्याने होत होती, ज्याला आता आमदार जगताप यांच्या पत्रामुळे राजकीय आणि प्रशासकीय पातळीवर मोठे बळ मिळाले आहे.
आमदार शंकर जगताप यांनी आपल्या पत्रात स्पष्ट केले आहे की, हा केवळ एका क्षेत्राला नाव देण्याचा विषय नसून महाराष्ट्राच्या महान संतपरंपरेचा अधिकृत सन्मान करण्याचा आणि वारकरी संप्रदायाचा सांस्कृतिक व आध्यात्मिक वारसा भावी पिढीसाठी अधिक वृद्धिंगत करण्याचा ऐतिहासिक प्रयत्न आहे. या निर्णयामुळे या परिसराच्या सर्वांगीण विकासाला आणि जतनाला कायदेशीर अधिष्ठान प्राप्त होईल. त्यामुळे राज्य सरकारने या मागणीचा गांभीर्याने विचार करून तातडीने सकारात्मक निर्णय घ्यावा, अशी विनंती त्यांनी केली आहे.
Labels: Maharashtra News, Warkari Sampraday, Dehu Alandi, MLA Shankar Jagtap, Devendra Fadnavis, Spiritual Tourism, Santbhumi Demand
Search Description: Chinchwad MLA Shankar Jagtap urges CM Devendra Fadnavis to officially declare the holy Dehu-Alandi region as 'Santbhumi' on the lines of Uttarakhand's 'Devbhumi'.
Hashtags: #Santbhumi #DehuAlandi #WarkariSampraday #ShankarJagtap #DevendraFadnavis #MaharashtraPolitics #Alandi #Dehu
Reviewed by ANN news network
on
६/१७/२०२६ ०२:४६:०० PM
Rating:
कोणत्याही टिप्पण्या नाहीत: